Ислом Исмоилов "Химки"да кўрган-кечираётганлари, Сергей Юрандан нима ўрганаётгани ва нега таклифларни қабул қилмагани ҳақида муносабат билдирди

Ўтган йили “Турон” клуби билан Суперлигада маълум вақт ишлаган ва қисқа фурсат ичида кўзга ташланиб қолган ёш мутахассис Ислом Исмоилов айни пайтда ўз устида ишлашда давом этяпти ва мураббийлик учун ташкил этилган про лицензияси учун ўқув курсида таҳсил оляпти.

Амалиёт ўташ учун эса Исмоилов “Локомотив” устози Денис Коростиченко билан бирга Россия премьер-лигаси қатнашчиларидан бири – “Химки” жамоасида малакасини оширмоқда. У Sports.uz мухбирига айни чоғдаги таассуротлари билан ўртоқлашди.

“Химки”га Фёдоров орқали келдик”

- Про лицензиясига ўқиш давомида шундай банд киритилганки, имтиҳонлардан олдин қайсидир мамлакатга бориб амалиёт ўтаб келиш керак. Яқинда 5-модуль бошланади. Шундан аввал, барча мураббийлар амалиётга чиқиб кетган. Кимлардир Қозоғистонга, кимлардир Озарбайжонга боришди. Биз “Химки” клубига Андрей Витальевич Фёдоров орқали келдик.

“Мураббий билганларини беркитмасдан бизга айтяпти” 

- Амалиётимизнинг муддати ўйиндан-ўйингача бўлиши керак. Бу бир ҳафта вақтни ўз ичига олади. Яъни, чемпионат давомида бўлаётган жараёнларда қатнашишимиз талаб этилган. Таассуротларга келсак, барибир Россия футболи анча ривожланган. Ҳар бир клубида профессионал мутахассислар ишлайди. Фарқ сезиларли даражада, бу ерда ўрганиш учун янгиликлар жуда кўп. Шахсан ўзим учун кўплаб янгиликларни оляпман. Қисқа муддат ичида ҳам анча маълумотларга эга бўлдик. Сергей Юранни ҳамма билади, машҳур футболчи бўлган. Мураббийлик соҳасида ҳам “Химки”ни қабул қилиб олгач, жамоанинг натижалари яхшиланишни бошлади. Бу нарсалар ҳам биз учун қизиқ туюлди. Юран пастга тушиб кетаётган клубни бошқариб, уни олдинги ҳолатига қайтараётган мураббийлардан ҳисобланади. Унинг фаолияти албатта қизиқ. Биз билан очиқ суҳбатлар ўтказяпти. Ўз фикрларини айтиб, биз билан тажрибасини баҳам кўряпти. Бу ерда яна бошқа факторлар ҳам бор, бу футболчиларнинг савияси. Биламиз, Россияда тажрибали легионерлар ҳам тўп суради. Ҳозирги амалиётимиздан мақсад ва ўрганаётганимиз шуки, битта ўйиндан кейингисигача клуб қандай ишларни амалга оширади? Тикланиш жараёни қандай бўлади? Рақибни қандай ўрганяпти? Ёки жамоасини навбатдаги учрашувга қандай тайёрлайди? Нималарга эътибор қаратади? Шунга ўхшаган ҳолатларни ўрганяпмиз. Мураббийга ҳам раҳмат, ўз маълумотларини беркитмасдан биз билан баҳам кўряпти.

“У билан Остон Ўрунов тўғрисида гаплашмадик”

- Инсонийлик томондан яхши, камтар ва содда. Юран билан суҳбат давомида ўзбек футболини муҳокама қилмадик. Биз асосан ундан кўпроқ тажриба ўрганиш мақсадида фаолиятида нималарга эътибор бераётгани, жамоасининг ўйин услубини қандай қураётгани, техник-тактик жиҳатлар устида гаплашяпмиз. Кўпроқ замонавий футбол тўғрисида суҳбатлашяпмиз. У барчасини очиқ-ойдин айтяпти. Юран суҳбат давомида айтдики, Португалия, Англия ва яна кўп жойларда мураббийлик амалиётини ўтказган экан. Остон Ўрунов тўғрисида у билан суҳбатлашганимиз йўқ. Асосан, жамоанинг тайёргарлиги борасида гаплашяпмиз. Бошқа ҳар хил мавзуларга чалғиганимиз йўқ. Ўзи ҳам бизга Ўрунов мавзусида оғиз очмади.

“Бу ерда умуман бошқача экан”

- Сергей Юран билан гаплашганимизда биринчи навбатда ўзим учун шуни яхшироқ тушуниб етдимки, янги клубни қабул қилаётганда нималарга эътибор қаратиш муҳимлигини билдик. Масалан, раҳбарият билан қандай келишувга эришиш керак? Қандай талаблар қўйилади? Янги клубни қабул қилаётганида қайси йўналишларга эътибор қаратиш лозим? Хуллас, барчасини ипидан-игнасигача ҳал қилиб олиш даркор. Тўғриси, шу жиҳатлар бўйича ҳам ўзим учун янгилик олдим. Ўйинга тайёргарлик жараёнида бизда бироз бошқачароқ бўлади. Буларда эса бу борада умуман бошқача экан. Шу нарса ҳам менга янгилик бўлди. Бир сўз билан айтганда, машғулотларда биз кўздан қочирадиган ҳолатлар бор экан. Шу кунгача эътибор қилмаган жиҳатларимиз борлигига амин бўлдим. Шунингдек, биз фақатгина Юранни ўзи билан чекланиб қолмасдан клубдаги барча ходимлар билан ҳам гаплашишга ҳаракат қиляпмиз. Масалан, клуб “администратори” билан суҳбатлашдик. Барибир уларда савия бошқа-ку. Бош мураббий сиздан кўпроқ нимани талаб қилади, шу хусусида маълумотлар олдик. Клуб оператори, шифокорлари, массажчилар ва бошқалар билан ҳам гаплашиб, нимадир ўрганяпмиз. Барибир улар ҳар куни клубда ишлашгани учун мураббийни яхшироқ билишади. Улар ҳам бошқа жамоаларда фаолият кўрсатишган ва кўп нарсани билишади.

“2 та клубдан таклиф бўлди, аммо...”

- Кейинги режаларга тўхталсам, ҳа орада иккита клубдан таклиф бўлди. Аммо баъзи масалаларда фикримиз бир жойдан чиқмади. Лекин бошқа айтарли таклиф бўлгани йўқ. Чақирув Суперлигадан бўладими ёки про лигаданми, буни фарқи йўқ. Лекин ўз олдига юқори мақсадларни қўядиган клуб бўлса, ўрганганларимизни амалда қўллашга ҳаракат қиламиз.