Ислом Махачев-Чарльз Оливейра кимда имконият юқори? Ўзбекистон ММА олами вакиллари жавоб берди

Мана "UFC 280" турнирига хам саноқли кунлар қолди. Бутунжаҳон ММА ихлосмандларини диққат эътибори Абу-Дабига қаратилади десак, муболаға бўлмайди.

Чунки, 22 октябрь куни енгил вазн тоифасининг энг кучли икки вакили чемпионлик камари учун жанг қилади. Ҳа, Ислом Махачев олдида жуда қийин рақиб Чарльз Оливейра турибди. Бу тўқнашув борасида турли хил фикрлар мавжуд. Биз анъанага содиқ қолган ҳолда, юртимиз ММА олами вакилларини фикри билан қизиқдик.

Жаҳонгир Қорабоев - мураббий 

- Ҳар иккиси жуда кучли жангчилар ва баҳс қизиқарли тарзда ўтади. Махачевга мухлислик қиламан ва ғалаба қозонишини истайман. Бироқ, Оливейра дивизиондаги ТОП жангчиларни енгди ва унинг жиу-житсуси жуда кучли. Махачевда эса кураш, греплинг  ажойиб тарзда шаклланган. Қолаверса, жанговар самбо борасида жуда яхши кўникмага эга. Демоқчиманки, ҳар иккисининг кучли "қурол"лари мавжуд. Шундай экан, имкониятларни 50/50 деган бўлардим. 

Фарруҳ Мадаминов - мураббий 

- Гарчи, Ислом Махачевга мухлислик қилсамда, бу жангда Оливейра ғалаба қозонади, деб ўйлайман. Чунки, унинг дуч келган рақибларига эътибор қаратсангиз, вазн тоифасини хақиқий лидерларини осонлик билан мағлуб этган. Оливейра "стойка" да устун ва жуда кучли зарбага эга. "Партер"да эса жиу-житсусини ишга солади ва бу борада унинг олдига тушадигани йўқ. Хуллас, имконият Оливейрада юқори. 

Жасур Алижонов - мураббий 

- Бу қарама-қаршиликда Махачевнинг имконияти юқори деб ўйлайман. Албатта, ҳар иккиси мағлубиятсиз одимламоқда.Оливейра ҳам оддий жангчи эмас.Бироқ, ҳозир Махачевнинг даври ва у юқори жисмоний ҳолатга эга, деб ўйлайман. 

Марат Бекмуратов - менежер (Қирғизистон)

- Ҳабибларнинг жамоасида ўзига хос кўникма мавжуд. Яъни, улар жангни бошидан назорат қила бошлайди.Демоқчиманки, курашда, "партер" да доминантлик қилишни Абдулманнап Нурмагомедов уларга сингдириб юборган ва жуда тартибли ишлашади. Агар, Махачев ўша бир маротаба нокаутга учраган ҳолатдаги каби вазиятга тушмаса, 5 раунд ўзининг кучли греплинги эвазига "партер" да устунлик қилади. Оливейра ўзининг греплинги ва жиу-житсуси билан Махачевни хайрон қолдира олмайди. 

Парвиз Абдумавлонов -менежер

- Жуда қизиқарли жангни гувоҳига айланамиз. Кўпи билан бу баҳс 3  раунд давом этса керак. Ислом Махачевни ютишини ҳоҳласам-да ва унга мухлислик қилсам-да, бу жангда Оливейранинг имконияти юқорироқ. У сўнги жангларда жуда кучли рақибларини мағлуб этди ва бу унинг энг юқори "форма"да эканлигини англатади. Аммо, бу UFC ва ким ғалаба қозонишини 22 октябрь куни билиб оламиз. 

Зарруҳ Адашев - ММА жангчиси

- Албатта, Ислом Махачев ғалаба қозонади, деган фикрдаман. Сабаби, Оливейра тўғри кучли рақибларни мағлуб этган. Бироқ, уларнинг барчаси "стойка"да жанг олиб борувчилар эди. Қолаверса, нокдаунга учратиб ҳам босим қилишга рақиблари чўчиганди. Ислом эса аксинча йиқитдими зарбалар беришга ҳаракат қилади. Ўйлашимча 3-раундда Ground- and - pound орқали техник нокаут билан Махачев ғалаба қозонади.

Жамол Муталибов - ММА жангчиси 

- Менимча UFC тарихидаги энг қизиқарли жанглардан бири бўлади. Махачевга мухлислик қилсам-да, тан олиш керак, Чарльз Оливейра жуда кучли ва бу сафар ҳам ғалаба қозонса керак. Чунки Махачевни кураши кучли бўлса ҳам "партер"да Оливейра хавфли ва исталган ҳолатда у оғриқли услубни қўллай олади. "Стойка" да эса қандай жанг олиб боришини ўша Порье, Гэтжи ва Чендлерга қарши баҳсларида гувоҳ бўлдик. Бу борада ҳам у Махачевдан яққол устун, деб ўйлайман. 

Ҳумоюн Маҳкамов - ММА жангчиси 

- Қизиқарли жанг бўлади. Ҳар иккиси жуда кучли атлетлар. Оливейранинг арсенали бойроқ бўлса ҳам назаримда Махачевнинг кураши ва греплингига у дош бера олмаса керак. Махачев ғалаба қозонади, деган умиддаман ва унга мухлислик қиламан.