Ислом Махачев Хабиб Нурмагомедовни сояда қолдирдими?

Ким кучлироқ? Келинг, ҳозир икки супер юлдуз Ислом Махачев ва Хабиб Нурмагомедовни ўзаро ҳолис таққослаб кўришга ҳаракат қиламиз. 

Ислом Махачевга устунликни бериш учун аргументлар:

Махачев Хабиб бажармаган ишни қилди, яъни  у 77 кг га кўтарилди. Ярим ўрта вазн тоифасидаги йўл қанчалик муваффақиятли бўлишини ҳозирча билмаймиз, бироқ бундай таваккалчиликнинг ўзи Исломга нисбатан устунликни беришимизга сабаб бўла олади. 

Махачев тахминан, 19 ойдан буён "Pound-for-Pound" рейтингида биринчи ўринни эгаллаб турибди! Бу UFC тарихидаги энг узун даврлардан бири. Хабиб ўз фаолиятини якунлаганидан кейингина P4P етакчисига айланди, унга ҳурмат кўрсатилди ва олти ой давомида биринчи ўринда турди.

Ислом ғалабали сериясини давом эттирмоқда. UFC тарихида энг узун серияга эга жангчи ҳозирча Андерсон Силва ҳисобланади - 16 ғалаба. Махачевда эса 15 та. Агар доғистонлик навбатдаги баҳсда зафар қучса, ҳам рекордни такрорлайди, ҳам ярим ўрта вазндаги камарга эга чиқади.

Хабиб Нурмагомедовга устунликни бериш учун аргументлар:

Ислом қанча ғалаба қозонмасин, рекордларни янгиламасин, унда Ҳабибнинг аураси йўқ! Нурмагомедов октагонга чиққанда ғолиб тахмин қилинмасди, чунки барчаси аниқ эди. Хабибнинг услубига қарши ҳеч ким чора тополмаган.

Ислом бразилиялик Чарльз Оливейра билан курашди, дунёнинг нариги томонида Волкановски билан жанг қилди, бироқ бу баҳсларнинг ҳеч бири Нурмагомедов ва Конор Макгрегор даражасида бўлмади. Унинг даврида бундай "Макгрегор" йўқлиги Махачевнинг айби эмас, лекин бу ҳақиқатни эътиборсиз қолдиришнинг ҳам иложи йўқ.

Одамлар Исломнинг муваффақиятида Хабибнинг ҳизмати катта эканини билишади. Буни Махачевнинг ўзи ҳам инкор этмайди.   


Кўриб турганингиздек, натижа борасида Махачев Хабибдан яхшироқ, бироқ ким кучли эканини ҳар доми ҳам бу усул билан аниқлаб бўлмайди. Биз сизга аргументларни тақдим этдик. Хулоса эса сиздан!