Исроил Мадримов, Баҳодир Жалолов, Қудратилло Абдуқаҳҳоров ва бошқа яккакураш вакилларимиз кимга ҳавас қилишган? (2-қисм)

Юртимизнинг машҳур бокс ҳамда ММА жангчиларининг ёшликдаги кумирлари ҳақида сўз юритгандик ва бир қатор вакилларимизнинг бу борадаги фикрларини эътиборингизга ҳавола этганмиз.  

Ушбу мавзуни давом эттирган ҳолда, яна баъзи таниқли спортчиларимизнинг кумирлари билан қизиқдик...

Қудратилло Абдуқаҳҳоров- боксчи

- Ёшлигимизда жуда кўп бокс юлдузларига ҳавас қилардик ва уларга ўхшаб, уларнинг услубларини, зарбаларини ўзлаштиришга ҳаракат қилганмиз. Шунинг учун ҳам кумирларим бир нечта бўлган. Ўзимиздан Руслан Чагаев ва Муҳаммадқодир Абдуллаевга ҳавас қилган бўлсам, жаҳон боксида Муҳаммад Али ҳамда Майк Тайсоннинг мухлиси бўлганман. Ушбу чармқўлқоп усталари ёшликдаги кумирларим бўлган.

Баҳодир Жалолов-боксчи

- Мен асосан украиналик Владимир Кличкога қизиқардим.Унинг жангларини қолдирмасдан томоша қилардим.  

Исроил Мадримов- боксчи 

- Ёшлигимизда ўзимизнинг боксчилардан Элшод ака Расуловга, жаҳон бокс оламида эса Рой Жонсга ҳавас қилардим.  

Ҳумоюн Тўхтамуродов- ММА жангчиси 

- ММАга қизиқишимга "Сўнгги Император", дея аталувчи Фёдор Емельяненко сабаб бўлган. Ёшликдан унинг жангларини томоша қилиб, завқ олганмиз ва у каби жангчи бўлишни орзу қилардик.  

Олимжон Назаров- боксчи

- Бизнинг ёшлигимиз Майк Тайсоннинг юлдузли онларига тўғри келади. Унинг жангларини мароқ билан томоша қилардим ва ҳайратда қолардим. Унинг чинакам мухлиси бўлганман. Боксга кириб келишимнинг сабабларидан ҳам бири айнан Майк Тайсон бўлади. Шунинг учун ҳам мени яқинларим кичик Тайсон, деб аташарди. 

Камолиддин Мамажонов- ММА жангчиси

- Менимча, кўпчилик ММА жангчиларини ёшликдаги кумири Фёдор Емельяненко бўлса керак, деб ўйлайман. Мен ҳам унинг жангларини томоша қилиб, ушбу спорт турига меҳр қўйганман. 

Абдурасул Исмоилов-боксчи

- Ёшлигимда жуда кўплаб, боксчиларни томоша қилиб, уларга ҳавас қилганман. Аммо, кейинчалик бокс оламига кириб келганимдан сўнг, Василий Ломаченконинг жангларини томоша қилиб, унга ҳавасим келарди. Кумирим Лома!

Абдулазиз Нажмиддинов-боксчи

- Боксга қадам қўйишимиздан аввал, ўша вақт юлдузлари Флойд Мейвезер, Мэнни Пакьяо, Оскар Де Ла Хойянинг жангларини томоша қилардик. Барчасини жанглари ёқарди. Бироқ улар орасида барибир Де Ла Хойяга қизиқишим юқори бўлган.