Исроил Мадримовни қийин синов кутмоқда ёхуд у дарҳол чемпионлик камари учун жанг қила оладими?

2021 йил декабрь ойида Тошкентда бўлиб ўтган профессионал бокс оқшомида Исроил Мадримовнинг Мишель Сорога қарши жанги натижаси гонгдан сўнг берилган зарбалар ва ҳакамнинг хатоси сабабли WBА ташкилотини қониқтирмади ва улар ўртасида реваншга буйруқ берилди. Иккинчи тўқнашув 9 июль куни Англиянинг Лондон шаҳрида жойлашган “О2” аренасида бўлиб ўтиши белгиланган.

WBА рейтингида 1, WBCда 9 ва The Ring нашри норасмий рейтингида 8-поғонада қайд этилган Мадримов (8-0, 6KO) бу сафар ортиқча саволга ўрин қолдирмоқчи эмас.

“Мен реванш жанги ташкил этилаётганидан хурсандман ва бу мавзуни батамом ёпишни хоҳлайман. Биринчи жангдан кейиноқ, агар бирон муаммо бўлса, реваншга тайёр эканлигимни айтган эдим”,-деди Мадримов The Ring нашрига.

27 ёшли Мадримов 7 ой олдин Тошкентда Соро билан жанг қилгани у учун фойдали бўлганини ҳис қилмоқда.

“Мен учун ҳар бир жанг янги тажриба, айниқса бу каби юқори даражада бўлса. Дастлабкиси бокс оқшомининг асосий баҳсида топ боксчига қарши илк жангим эди”,-деди у.

Одатда, машғулотларини Калифорниянинг Индио шаҳрида Жоэл Диаз қўл остида олиб борувчи ҳамюртимиз илк бор Буюк Британияда жанг қилиш имкониятидан мамнун эканлигини билдириб, Соро бу кечада унга энг қийин синовни тақдим этишини тахмин қилмоқда.

“Ҳар доим Британияга бориб, британиялик мухлислар қаршисида жанг қилиш имкониятига эга бўлиш орзуим бўлган. Балки у ерда дунёдаги энг зўр мухлислар бор. Британияликлар қаршисида ўз маҳоратимни намоён этиш орзуси рўёбга чиқди.

Менинг фикримча, Соро 154 фунт вазнда камарга эга бўлмаган боксчилар орасида энг зўри. Тажриба, услуб, куч ва бутун фаолияти уни ушбу дивизиондагилар орасида энг зўрларидан бири эканлигини кўрсатиб турибди”, - деб қўшимча қилади у.

Мадримов, гарчи 8 та профессионал жангда жами 56 раунд ҳаракат қилган бўлса-да, у топ даражага чиқишда жуда тез одимлади.

“Профессионал дебют жангимдан бери орзуим ўзгармаган. Бу - чемпион бўлиш ва камарлар кимда эканлигидан қатъий назар, бўламан ҳам. Ҳозирда мақсадимга етишиш йўлида Сорони мағлуб этишим керак ва фақатгина биттамиз омадли бўлиб чиқиб, яна юқорига одимлаймиз. Барчаси Яратгандан”,- дея ўз ишончини билдиради Мадримов.

Ушбу вазн тоифасида барча 4та камар Жермелл Чарлога тегишли бўлиб, ҳозирда унинг қаршида Тим Цзю (WBО йўналишида) ва Баҳрам Муртазалиев (IBF йўналишида) каби мажбурий даъвогарлар турибди. Исроил Мадримовнинг менежери Вадим Корнилов унга жаҳон чемпионлик камари учун баҳсни тезроқ олиб беришга ҳаракат қилса-да, бу дарров бўлмаслиги мумкинлигини ҳам, айтиб ўтмоқда.

“Ҳозирдан буни башорат қилиш қийин, лекин воқеликлар тез ўзгариб кетиши мумкин. Агар кутишимиз ёки чемпионликкача бирон жанг ташкил қилишимиз керак бўлса ҳам, муаммо эмас. Бу фақатгина Мадримовга ўз вақти келгунига қадар яхши тажриба олишига ёрдам беради”,- дейди Мадримов билан бир қаторда, Дмитрий Бивол, Муроджон Аҳмадалиев каби боксчиларнинг менежери ҳисобланган Корнилов.

WBА рейтингида 2, The Ring томонидан эса 9-поғонада қайд этилган франциялик Мишель Соро профессионал боксга 2008 йилда қадам қўйган. У фаолияти давомида Глен Тапиа, Хавьер Масиэль, ва Сердик Виту каби боксчиларни мағлуб этиб, ўз куч ва қобилиятларини исботлаб келган бўлса, Заурбек Байсангуров, Брайан Кастаньо ва сўнги жангида Исроил Мадримовга мағлуб бўлган бўлишига қарамасдан, жангларда ўзини яхши томондан кўрсата олган. У Мадримовга қарши реванш жангида 35-3-1 (24 нокаут) рекорд билан рингга кўтарилади.

Улар ўртасида WBА элиминатор мақомидаги реванш баҳси 9 июлдан 10 июлга ўтар кечаси Лондон шаҳрида Matchroom компанияси томонидан ташкил этиладиган бокс оқшомида бўлиб ўтади. Марказий тўқнашувда эса оғир вазнлилар Дерек Чисора ва Кубрат Пулев ўзаро иккинчи жангда рингга кўтарилади.

The Ring нашри асосида Жалол Ахмедов тайёрлади