Хабарингиз бор, яқинда Фарғонанинг “Истиқлол” клуби фаолиятини тугатди. Натижада про-лигадан чиқиб кетди. Унинг иштирокидаги натижалар эса бекор қилинди.

Маълумки, жамоа тўртта турда иштирок этган бўлиб, барчасида мағлубиятга учраганди. Шунингдек, мураббийлар ҳам ўзгартирилганди. Дастлабки турда Баҳодир Шамшиддинов, қолган учта учрашувда Баҳром Ҳакимов бош мураббийлик қилди. Гарчи таркиб у қадар кучсиз бўлмаса-да, жамоа мавсумни яхши бошлай олмади.

“Истиқлол” раҳбарларининг тоқати тоқ бўлди шекилли, жамоани ёпишди. Аслида бу биринчи марта эмасди. Ёдингизда бўлса, ўтган йили ҳам “Истиқлол”нинг фаолияти тугатилгани эълон қилинган. Кейин орадан бир неча кун ўтгач, жамоанинг фаолияти яна давом эттирилганди. Хуллас, яна ўша манзара такрорланди. Жамоадаги тажрибали футболчилардан бири Мўйдин Мамазулумов бу ҳақида ўз муносабатини билдирди:

- 10 апрель куни “Оқ-тепа” билан ўйнадик, - дея гап бошлади, ҳужумчи. - Ўша учрашувдан кейин раҳбарлар клуб ёпилди, бизга бундай жамоа керак эмас деди. Бу ҳолат ўтган йили ҳам айнан “Оқ-тепа”га қарши беллашувдан кейин юз берганди. Натижада ўшанда кўпчилигимиз бошқа клубларга кетиб қолгандик. Бу йил ҳам вазият шундай тус олди. “Истиқлол” ёпилгач, бир қанча футболчилар бошқа жамоаларнинг сафига қўшилишди. Аҳрор Ўктамов, Элдор Эргашев, Шохруҳ Бойқўзиев ва Аббос Махсталиев “Рубин” жамоасига қўшилди. Булардан ташқари, Абдуҳолиқ Қурбонов, Элёр Мамасолиев ва Сардор Сотволдиев “Хоразм”га ўтиб кетишди. Хушнуд Бозоров эса “Машъал” ўринбосарларига йўл олди. Қолган ёш футболчилар қаерда? Менимча, уйда бўлишса керак. Мен, Мансур Саидов, Фарруҳ Турдиалиев ва Дилёр Эрматов фурсатдан фойдаланган ҳолда Фарғонада ташкил қилинган мураббийлар учун “С” лицензиясининг ўқув-курсларида ўқияпмиз. Эртага бу бизга керак бўлади. Барибир кейинчалик мураббийликни танлаганимизда ҳам асқотади. Аслида мураббийликка ўқиш ниятимиз бор эди. Қишда Фарғонада “Ҳоким Кубоги” мусобақаси ўтказилгач, “D” лицензиясига ўқиб олгандим. Кейин май ойининг охирларида “С” учун ўқиш бўлишини айтишган. Ўйинлар бўлса ҳам ора-орада бориб ўқиб олишни ният қилгандик. Мана, энди клуб ёпилди ва мураббийлик учун курсларда тўлиқ қатнашяпмиз.

муйдин

Агар мавсум бошида “Истиқлол”да яна шундай вазият юз беришини билганимизда 25 нафар футболчи бу жамоага келмаган бўларди. Таркибда ёмон ўйинчилар тўпланмаганди. Фақат бироз сабр қилиш керак эди ва яхши мураббий олиб келиш лозим эди. “Хоразм”га қарши ўйиндан кейин Баҳодир Шамшиддиновни бўшатишди. Менимча, бу нотўғри эди. Унга ҳеч бўлмаганда, яна имконият бериш лозим эди. Ўша биринчи турда ҳам ёмон ўйнамагандик. “Хоразм” билан беллашувдан кейин Баҳром Ҳакимовни олиб келишди. Бу мураббий бошчилигида учта ўйинда қатнашдик, аммо натижа бўлмади. Аксинча, ишлар орқага қараб кетди. Раҳбарлар яхши иш қилишмади. 25 та ўйинчи кўчада қолди, бир қатор мураббийлар ишсиз қолди. Ҳаммамизни бола-чақамиз бор. Рўзаи-рамазон кунларида клубни ёпиб юборишлари яхши иш бўлмади. Ҳеч бўлмаганда биринчи даврагача имконият бериб, ўйнаб туриш керак эди. Кейин натижага қараб бирор хулосага келишса бўларди. Нима бўлганда ҳам яхши иш қилишмади.

истиклол эмб

Февраль ойининг ярми ва март ойлиги бўйича иш ҳақларимиз қолган. Ўтган йили ҳам “Истиқлол” ёпилди дейишди, ўша маҳалда 7-8 та футболчи бошқа клубларга кетишгач, орадан кўп ўтмасдан жамоани яна қайта тиклашди. Ўша пайтда ҳам ойлик маошларимиз ва мукофот пулларимиз бўйича қарзлар қолиб кетган. Клубни тарк этганларга бермайман дейишган. Ким қолган бўлса, ўшаларга пулларини берган.

Энди Худоим ўзи бир йўлга бошлар. Насиб қилса, яна фаолиятимизни давом эттирармиз. Ёки бўлмаса, кимгадир ёрдамчи бўлармиз. Боя айтдим, ҳозирги танаффус пайтидан фойдаланиб мураббийликка ўқиб оляпмиз. Кимдир ёнига чақирса, ёрдам бераверамиз. Агар футболчи сифатида қайсидир жамоага керак бўлсам, кучим етишига ишонаман. Ҳозирги ўйнаётган ўйинчилардан кам жойимиз йўқ. Клублардаги ҳужумчиларни кўряпмиз, ҳали ўзини оқламаган футболчилар ҳам бор.

муйдин1

Баҳром Ҳакимов бошчилигида учта ўйин ўтказдик. Мураббий ҳар интервьюсида жамоада бошида мен бўлмаганман деб таркибдаги ўйинчиларни камситаверди. Бу нотўғри фикр эди. “Истиқлол”даги 25 та футболчи ҳам ўйнайдиган йигитлар эди. Бизда деярли иккита таркиб бир хил кучга эга эди. Қолдиқ футболчилар эмасди. Бу мағлубиятлардан кейинги мураббийнинг ўз фикри деб ўйлайман, - деди Мамазулумов.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Фикрлар

Фикр қолдириш учун авторизациядан ўтинг!
Алишер Собиров
04/05/2021 09:36
МУЙДИН ТУГРИ ГАП ХАКИМОВ БИРОН ИШНИ КОЙИЛАТИБ КУЙМАСДАН ЙИГИТЛАРНИ КАМСИТИБ ЮБОРДИ.УЗИ ЮЗИДАН КУРИНИБ ТУРАДИ ГНИДАЛИГИ