Италиянинг 9 карра чемпиони, Тони, Милито, Креспо каби ҳужумчиларни танитган, Элдор Шомуродовни сотиб олган “Женоа”

Ҳамюртимиз Элдор Шомуродов “Ростов”даги 3 йиллик фаолиятидан сўнг, ўз омадини Апеннин яриморолида синаб кўришга қарор қилди. Унга “Фиорентина”, “Сельта” каби ўз номига эга, нисбатан каттароқ клублар таклиф билан чиққан эди. Бироқ Элдор Италиянинг энг тарихий клубларидан бири “Женоа” сафида кўчиб ўтди ва бу қарори билан энг маъқул йўлни танлади, назаримизда. Чунки Шомуродовнинг потенциали юқорилигини ҳисобга олсак, “Женоа” унинг учун зинапоянинг шунчаки навбатдаги қисми. Нариги икки клуб таркибида эса "Шома" захира ўйинчисига айланиб қолиши ҳам мумкин эди. Биз юртдошимиз йўл олган клуб ҳақида нималар биламиз?

“Женоа” 1893 йилда ташкил топган бўлса-да, футбол билан боғлиқ фаолиятга 4 йилдан кейингина киришган. Унгача енгил атлетика ва крикет клуби сифатида фаолият юритган. Айтиш жоизки, футбол жамоасига асос солиниши анча омадли ва амалда ўзини оқлаган қарор эди. Генуяликлар дебют мавсумидан бошлаб кетма-кет 3 йил Италияда тенгсиз бўлишган.  Кейинчалик яна бир йил танаффус қилган “қизил-кўклар” яна 3 мавсум “Скудетто”ни ҳеч кимга бермаган. Умумий титуллар сони 9 тани ташкил этади ва уларнинг сўнггиси 1923/24 йилги мавсумда қўлга киритилган. Кўриб турганингиздек, жамоанинг мақташга арзигулик тарихи бор. Аммо бугунги кун ҳақида сўз юритганда бу мақтовлардан бироз чекланишга мажбур бўламиз. Ўтган мавсумда генуяликлар аранг элитада жон сақлаб қолгани ҳам айни ҳақиқат. Таркибда айнан Элдордек ҳужумчи йўқлиги уларни сўнгги 2 йилда аутсайдер мақомига тушириб қўйган эди. Нега бундай бўлди?

“Женоа” охирги мавсумларда кучли ўнликка ҳам кира олмаяпти. Фақатгина 2014/15 йилда фурор кўтара олган генуяликлар якунда 6-поғонани эгаллаган ҳолда, кучлилар қаторида эътироф этилган. Бу клубнинг ортда қолган декададаги энг яхши натижаси ҳисобланади. Ушбу жамоа сафида Лука Тони, Эрнан Креспо, Диего Милито, Алессандро Матри, Яго Фальке, Леоандро Паволетти, Альберто Жилардино, Родриго Паласио каби савияли ҳужумчилар тўп тепган. Бироқ бугунги кунда клуб яхши ҳужумчига эҳтиёж сезмоқда. Генуялик раҳбарларнинг бир жиҳати таҳсинга лойиқ: улар жамоада порлаган футболчиларни яхши таклиф тушса, каттароқ клубларга қўйиб юборишдан қайтмайди. Бу йўл барча учун манфаатли. Футболчига ўсиш учун имконият берадиган мутасаддиларни футболда доим ҳам учратавермаймиз. Айниқса, Апеннин яриморолида! Шу жиҳатдан ҳам Шомуродов ўзи учун энг маъқул йўни танлади, деб қўрқмасдан айта оламиз.

Энди бевосита клубнинг ҳозирги ҳолати ҳақида тўхталсак. Юқорида таъкидланганидек, “Женоа” А Серияни кетма-кет иккинчи бор 17-ўринда якунлади. Таркиби асосан ёши катта футболчилардан ташкил топган жамоада Лассе Шёне, Маттия Перин, Горан Пандев, Доминико Кришито, Валон Бехрами, Кристиан Сапата, Милан Бадель, Марко Пьяца каби тажрибали футболчилар тўп тепади. Элдорда уларнинг тавсиялари билан ўз маҳоратини янада ошириш имконияти мавжуд. Шунингдек, жаҳон футболида ўз номига эга бўлган футболчилар билан бир жамоа шарафини ҳимоя қилишнинг яна бир фойдали жиҳати шундаки, юқоридаги номлар фаолияти давомида кўп нарсаларни исботлаб улгурлаган ва улар доим диққат марказида туради. Бу орқали турли хил скаутларнинг нигоҳи жамоанинг янги тўпурари бўлиши мумкин бўлган навқирон форвардга тушмайди дейсизми?! Йўқ, албатта. Бу жиҳат ҳам айнан Шомуродорга қўл келиши шубҳасиз.

Аммо сўнгги кунларда Италия томондан нохуш хабарлар ҳам келмоқда. Айнан “Женоа” клуби таркибида ўндан зиёд футболчи коронавирусга чалинган ва клубниинг А Серия навбатдаги туридан ўрин олган “Торино”га қарши ўйини номаълум муддатга қолдирилди. Ҳатто, Италия Соғлиқни сақлаш вазирлиги ҳам чемпионат ўйинлари тўхтатилишини иддао қилмоқда. Мана шундай муаммолар гирдобида қолиб кетган жамоа бу “Женоа”. Бироқ ушбу жиҳатлар “Шома”нинг келгуси фаолиятига тўсқинлик қилмаслигига ишонамиз! Олдиндаги баҳсларда фақатгина ўзидан кутилган ўйинни намойиш эта олса, кўп ўтмай ҳамюртимизни мамлакат бош соврини учун курашадиган жамоалар либосида кўришимиз ҳам шубҳасиз!

Жавоҳир Азимов тайёрлади!