Жаҳон чемпионати олдидан айрим футболчиларга виза чиқмади

Жанубий Африка Республикаси миллий терма жамоасининг айрим футболчилари виза ола олмагани сабабли жаҳон чемпионатига тайёргарликни давом эттириш учун Мексикага парвози номаълум муддатга кечиктирилди.

Маъмурий хатолик туфайли айрим ўйинчиларга зарур ҳужжатлар расмийлаштириб берилмаган.

- Сафар ва визалар билан боғлиқ бу ҳолат шармандали ва футболчилар ҳамда мураббийлар штабига нисбатан ўта адолатсиздир. Мен мамлакат футбол федерациясини бу ҳақда хабардор қилдим ва бу тартибсизлик учун масъул бўлган шахсларга нисбатан чора кўрилишини талаб қилдим. Бизни кулгили аҳволга солиб қўйишмоқда, - деб ёзди Жанубий Африка Республикаси спорт вазири Гейтон Маккензи ижтимоий тармоқда.

2026 йилги жаҳон чемпионатида Жанубий Африка футболчилари “А” гуруҳида иштирок этади. Ушбу квартетдан Мексика, Жанубий Корея ва Чехия терма жамоалари ҳам жой олган.