"Jahon chempionatiga chiqishimiz uchun bu safar imkoniyat katta" - terma jamoa ustozi Ermatov bilan uchrashuv va tayyorgarlik haqida

Ushbu oyning o‘rtalarida Osiyo chempionati saralash bahslari tashkillashtiriladi. O‘zbekiston o‘z guruhidagi o‘yinlarni mezbon sifatida Toshkentda o‘tkazadi.

Ayni paytda bo‘lajak uchrashuvlarga tayyorgarlik bo‘yicha reja ishlab chiqilmoqda. O‘zbekiston ayollar terma jamoasi bosh murabbiyi Bahrom Norsafarov oldida mas’uliyatli vazifa turibdi. Shu bois O‘FA vitse-prezidenti Ravshan Ermatov Norsafarov boshchiligidagi murabbiylar shtabi bilan uchrashib, kamchiliklar muhokama qilindi.

Bu xususida O‘zbekiston terma jamoasi bosh murabbiyi Sports.uz uchun quyidagilarni aytdi.

Tayyorgarlik va Ermatov bilan uchrashuv xususida

- Dekabr oyidan beri beshta yig‘in o‘tkazdik. Turkiyada shug‘ullandik. Keyin Belarus terma jamoasi bilan Toshkentda o‘ynadik va so‘ng, Belarusga bordik. Qolaversa, Eronni taklif qildik. Jahon chempionatida qatnashgan Afrika qit’asidagi terma jamoalar bilan ham o‘ynadik. Shu vaqt oralig‘ida 50 nafar qiz ko‘rikdan o‘tdi. Yakuniy ro‘yxatdan 23 tasi o‘rin oldi. Ular eng kuchli, ruhiy tomondan to‘liq tayyor va tajribalilari tanlab olindi. Futbolchi qizlarni saralab olishda avvalo ruhiy tayyorgarligiga va tajribasiga qaradik. Jismoniy holatiga ham e’tibor berdik, albatta. O‘FA tomonidan yig‘inlarimiz uchun barcha sharoitlar yaratildi. Endi Osiyo chempionati saralash bosqichi o‘yinlariga 12 sentyabrdan mashg‘ulotlarni boshlamoqchimiz. Nima uchun? Chunki 16-kuni musobaqadan avval Gonkong termasi bilan o‘rtoqlik uchrashuvini o‘tkazmoqchimiz. Keyin guruh o‘yinlariga kirishamiz. Ravshan Ermatov murabbiylar shtabini chaqirdi va bizdan qanday muammolar borligini so‘radi. Hammasini aytdik. Fitnes-murabbiy kerakligini va ruhshunos ham zarurligini bildirdik. Ruhshunos kelib-ketishi kerak emas, har kuni jamoa bilan birga bo‘lishi lozim. Keyin mehmonxona masalasini ham gaplashdik. Endi u erda har bir qiz alohida yashaydi. Biz o‘yinlarga vip-sektor tashkil qilib, qizlarning ota-onalarini ham taklif qilmoqchimiz. Bu ham futbolchilarga motivatsiya beradi, maksimum o‘zini ko‘rsatish uchun kurashadi. Oxirgi yig‘indan keyin kimda qanday jarohat bo‘lsa, barchasiga dori-darmonlarni tarqatib berdik. Ular klublarida muolajalarni olishyapti. Barchalariga alohida dastur berganmiz. Klublaridan tashqari shug‘ullanishlarini guruhda nazorat qilib turibmiz. 3 va 8 sentyabrda chempionatimiz doirasida ikkita tur bor. Ushbu uchrashuvlarda qizlarimiz jarohat olib qolmasa bo‘ldi. Biz bu imkoniyatni qo‘ldan chiqarib yubormasligimiz kerak. Hamma tayyor, jon-jahdimiz bilan musobaqaga kirishamiz. Turkiyada Nigeriya bilan o‘ynaganimizda ayrim etakchilarimiz yo‘q edi. Shunda ham yaxshi o‘yinlar bo‘ldi. Men jamoamizga ishonaman.

Asosiy vazifa

- Oldimizda turgan asosiy vazifa Osiyo chempionatiga chiqish. Final bosqichi Hindistonda o‘tkaziladi, 2022 yilning boshlarida. Jahon chempionati uchun Osiyoga 5+2 kvota ajratilgan. Beshta terma jamoa ichiga kira olsak, to‘g‘ridan-to‘g‘ri mundialga yo‘l olamiz. Plyus ikkita terma jamoa pley-off orqali hal bo‘ladi. Imkoniyat juda katta. FIFA tomonidan 32 ta terma jamoa birinchi marta jahon chempionatida qatnashadi. Osiyoga katta imtiyoz berilgan.

O‘z uyimizdagi saralash bahslari haqida

- Osiyo chempionati saralash bahslari Toshkentda o‘tadi. Maydon o‘zimizniki, futbolchilarni yaqinlari stadionda bo‘lishadi, o‘yinlar translyatsiya qilinadi, bular albatta yordam beradi. Asosiysi, qat’iy rejimni o‘rnatamiz. Muhim musobaqa oldidan futbolchilarga jiddiy tartib-intizomni joriy qilamiz. Telefonlarini yig‘ishtirib olamiz. O‘yinlarga jiddiy yondashish shart, buni o‘zlari ham tushunib turibdi. Guruhga ham motivatsiyani oshiradigan roliklarni jo‘natib turibmiz. Bu musobaqa ko‘p qizlarga oxirgi imkoniyat. Bundan foydalanib qolishmasa, keyin kech bo‘ladi.

Bosh murabbiyning klub va terma jamoada ishlashi xalaqit qilmaydimi?

- Klubda yordamchilarim bor, biz dastur bo‘yicha ishlaymiz. “Sevinch”ning asosiy tarkibidagi olti nafar qizimiz terma jamoamizning asosiy tarkibida o‘ynaydi. Men ularni ham klub orqali tayyorlab borishim kerak. Terma jamoa yig‘inlari bo‘lganida O‘zbekiston chempionati to‘xtatiladi. Menga ikki joyda ishlash xalaqit qilmaydi. Men klubda tayyorgarlik mashg‘ulotlari, texnik-taktik uslublarni aynan terma jamoa manfaati uchun o‘tkazaman. Aynan klubda ko‘proq tajriba olaman. U erda har xil eksperiment uslublarni va taktikalarni qo‘llab ko‘raman. Men uchun asosiysi terma jamoa. Chunki uslublarni klubda sinab ko‘rish orqali keyin termada qo‘llayman. Qolaversa, “Sevinch” ishtirokidagi o‘yinlarda raqib jamoa tarkibidagi termaga nomzod qizlarning o‘yinlarini o‘rganib boraman. Shuning uchun chempionatimizdgi barcha o‘yinchilarni yaxshi bilaman. Deyarli 10 yildan beri hamma qizlarning imkoniyatlarini o‘rganganman. Endi klublarda U-16 jamoalarini ochdik. Buning mevasi 5-6 yildan keyin bilinadi.

Raqiblar to‘g‘risida

- Qur’adan keyin albatta raqiblarni o‘rganyapmiz. Bungacha ular bilan U-16 va U-19 terma jamoalarida uchrashganmiz. Raqiblarimizni murabbiylarigacha o‘rganib boryapmiz. Ularning tarkiblari ham biz bilan tengma-teng ulg‘ayib boryapti. Masalan, qur’adan keyin Janubiy Koreya, Mongoliya bo‘yicha barcha ma’lumotlarni yig‘ib oldik. Ularni o‘rganmasak bo‘lmaydi.