Жалолиддинов Sports.uz мухбирига Италиядаги кўрик,

 

Футболимизнинг келажаги сифатида қаралаётган “Бунёдкор” тарбияланувчиси Жасур Жалолиддинов атрофида юз бераётган хабарлар ҳеч кимни бефарқ қолдирмаётгани рост.

Ўз ўйинлари билан хорижлик скаутларнинг эътиборини тортаётган футболчимизга Европа клублари томонидан жиддий қизиқишлар бўлаётгани биз учун ҳам қувонарлидир. Кўринишидан шуни англаш мумкинки, Жасурнинг келажаги Европа футболи билан боғлиқдек. Боиси, воқеалар ривожи шундай тус олмоқда.

Бу борада футболчининг ўзи ҳам кучлироқ чемпионатда тўп суриб, кучини синаб кўришга қарши эмас. Унга эса кўплаб таклифлар бор ва уларнинг орасида ҳамма яхши танийдиган Туркиянинг “Бешиктош” ҳамда Россиянинг “Локомотив” клублари ҳам мавжуд. Ёдингизда бўлса, у дастлаб Италиянинг “Беневенто” клубига бориб келганди. Жалолиддинов билан кейинги тақдири борасида мулоқот қилганимизда ҳаммасини очиқ-ойдин айтди ва аввало ҳаммасини ўша “Беневенто”дан бошлади.  

“Беневенто” профессионал йўл тутяпти”

-  Аввало “Беневенто” ҳақида тўхталишни истардим, у ерга бориб келганимга анча бўлиб қолганига қарамай, улар ҳали ҳам мени рўйхатидан ўчириб юборишгани йўқ. Бироқ вазиятга реал қарайдиган бўлсак, “Беневенто” мен учун амалга ошиши қийин бўлган вариант бўлиб турибди. У ерда юз бераётган муаммолар олдида ортиқча трансферлар ҳақида ўйлашмаса ҳам керак. Улар шунчалик профессионал йўл тутишяптики, бунга қойил қолса арзийди. Яъни, италияликлар билан гаплашган пайтимда ҳали ҳам бизнинг рўйхатимиздасан, аммо сенга бошқа клублар томонидан қизиқишлар бўлса, бемалол музокаралар олиб боравер, чунки биз фақат ўзимизни ўйламаймиз, сенинг келажагингни ҳам ўйлашимиз керак, дейишяпти. Агар бирор клубга кетсанг, бундан умуман хафа бўлмаймиз деб мени қўллаб-қувватлашяпти. Анча-мунчаси бундай йўл тутмайди, қайтанга фақат ўзимиз олсак бўлди, дейишади. Сизга ростини айтсам, бошни айлантириб юборадиган даражада таклифлар кўп бўляпти. Лекин шошма-шошарлик билан иш қилмаслик керак. Янги клубга ўтишимда ҳамма-ҳаммага қулай бўлиши лозим. Бундай ҳолатда дуч келган жамоага кетиб қолишим ҳам яхши эмас. Ҳали олдимизда Осиё чемпионати мусобақаси турибди. Бу эса менинг қайсидир клубга кетишимдан кўра муҳимроқ. Менинг бу истакларимни агентларим ҳам тўғри тушуниб туришганидан хурсандман.

жалолиддинов2_1

“Локомотив”нинг таклифи ҳаммага, жумладан ўзимга ҳам ёқяпти”

-  Биласизми, “Бунёдкор” клуби, агентларим ва “Локомотив” жамоаси билан музокаралар анча пайтдан бери юз бераётганди. Бунга ҳаттоки бир қанча ойлар бўлди. “Локомотив” клуби эса менга шундай шароит яратиб бермоқчики, масалан, “Беневенто”га дастлаб кўрикдан ўтиш учун боргандим. “Локомотив” эса мен билан дарҳол шартнома тузмоқчи. Янада эътиборлиси, улар билан шартнома имзолаганимдан кейин ҳам ярим йил мобайнида “Бунёдкор”да ўйнаб туравераман. Чунки ҳаммага ҳам менинг ўйин амалиётига эга бўлиб турганим муҳим. Бу зўр жамоа экан деб у ерга кетсам-да, аммо захирада қолиб, ўйин амалиётимни йўқотишим ҳам ҳеч гап эмас. Шунингдек, исталган янги клубда ўзига яраша кучли рақобат бор, яхши савиядаги легионерлар ҳам бўлади. Уларга энди мослашишни бошлаганимда эса кейин Осиё чемпионати учун яна кетишимга тўғри келади. Орада яна клубимда ўз ўрнимни йўқотишим мумкин. Хуллас, мана шундай пала-партишликлар юз бериши мумкин. “Локомотив” эса мен билан шартномани тузиб, “Бунёдкор”да ўйнаб туришимга рухсат беришади, орада Осиё чемпионатида ҳам иштирок этаман ва шундан сўнг хотиржам янги клубимга қўшилишим мумкин бўлади. Уларнинг таклифи ҳаммага, жумладан ўзимга ҳам ёқди. Музокаралар жараёнида ҳеч ким “кўрпачани” ўзига тортаётгани йўқ. Барча учун энг қулай йўл танлаб олиняпти.

“Бешиктош”нинг номи жарангдор эшитилади”

-  Масалан, агентлар Испания чемпионати, Германия Бундеслигасидан кейинги ўринда турувчи лигадан ва яна бошқа мамлакатлардан таклифларни билдиришди. Уларнинг орасида эса аниқроқ таклиф сифатида шуни айтишим мумкинки, Туркиянинг “Бешиктош” клубидан чорлов бўлди. Аммо мени ундан ҳам кўра кўпроқ “Локомотив” таклифи ўзига тортмоқда. Албатта, мухлис сифатида қарасак, “Бешиктош” номи жарангдор эшитилади. Лекин мен ҳали ёшман. Қолаверса, “Бешиктош”да қандай ўйинчилар борлигини биламан. Мени ўзбекистонлик ёш иқтидор эгаси деб ҳисобласак, у ерга борсам дарҳол “Бешиктош”нинг асосий таркибидан жой олмаслигим аниқ. Улар мени маълум муддат бошқа клубларга ижараларга берибми ёки ўз сафида захирада олиб юриб, кейинчалик асосий таркибга лойиқ, деб топишар. Лекин “Локомотив” менга ҳар томонлама яхши таклиф билдирмоқда. Кейинчалик менда қаерга кетсам ҳам асосий таркиб ўйинчиси сифатида йўл олиш имконияти бўлади. Мисол учун Элдор Шомуродовни олайлик, у бугунги кунда “Ростов”нинг етакчисига айланган. У ерда ўз ўрнига эга бўлиши учун бир йил керак бўлди. Энди бўлса, Шомуродов қаерга кетса ҳам янги жамоасига асосий таркиб ўйинчиси сифатида кетади. Агар Россия чемпионатига борсам, у ерда мен учун тил масаласида ҳам муаммолар бўлмайди. Шунинг учун ҳозирги пайтда мен учун узоқни кўзлаб қарор қабул қилиш жуда муҳим.

жалолиддинов4_1

“Тил масаласида қийналмаслик учун ҳам Россия чемпионати менга қулайроқ”

-  Аввало барчаси атроф-муҳитга боғлиқ. Олдингизда гаплаша оладиган, ёрдам берадиган жамоадошларингиз бўлиши керак. Масалан, “Беневенто”га борганимда бунинг қадрини билганман. Айниқса, жамоа ичида мулоқот қилиш катта роль ўйнар экан. Ёшгина йигитчанинг бошқа клубга бориб бировга ҳеч нима демасдан юриши бу яхши эмас. Бундай ҳолатда эса ҳеч ким биринчи бўлиб сиздан ҳол-аҳвол сўраб гапирмайди. Шу боис тил масаласи бўйича ҳам ортиқча қийинчиликларга дуч келмаслик мақсадида Россия чемпионати менга қулайроқ бўлиб турибди.  Халқаро авиарейслар очилиши биланоқ “Локомотив” клубидагилар Тошкентга келишади.

“Трансфер нархимнинг аҳамияти йўқ”

-  Трансфер суммасининг ҳеч қандай аҳамияти йўқ, деб ўйлайман. Менинг трансфер нархим салкам бир миллион евро эканлиги ҳақида билмагандим. Лекин бу масала бўйича иккала клуб ўзаро келишиб кетиши ҳам мумкин. Бу шунчаки клублар ўртасидаги ўзаро келишув ҳисобланади.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)

Фикрлар

Фикр қолдириш учун авторизациядан ўтинг!
&
jaxongir1979 fc NASAF
06/06/2020 05:45
Хар бир ишни уйлаб қилиш керак молодец омад Жасур