"Жамоамни ташлаб ҳеч қаерга кетмоқчи эмасдим" - "Сўғдиёна"нинг жавоҳири голини Жасур Ҳасановга бағишлади. Боиси...

“Сўғдиёна” иккинчи даврани ажойиб ғалаба билан бошлади. Тошкентда “Бунёдкор”га қарши учрашувда меҳмонлар жавобсиз 2 та гол уришнинг уддасидан чиқдилар.

Айниқса, жамоа сардори сифатида майдонга тушган Жавоҳир Қаҳрамонов ўйин қаҳрамонига айланди. Ўзи дастлабки голни урди ва иккинчи голга пас берди.

- Жавоҳир, аввало иккиннчи даврани ғалаба билан бошлаб олганинглар билан қутлайман. Айтинг-чи, “Бунёдкор”га янги мураббий келгач, жамоа ўзгарганми ёки йўқми?

- Иккинчи даврани ғалаба билан бошлашимиз шарт эди. Чунки биринчи даврада кўп очко йўқотдик. Шунинг учун жамоамизга ғалаба зарур эди. “Бунёдкор”га келадиган бўлсак, рақиб жамоа ёмон ўйин кўрсатмади. Уларга омад етишмади, деб ўйлайман.

- "Сўғдиёна" бош мураббийи "Бунёдкор"да 3 йил ишлаган ва собиқ жамоасини яхши биларди. У сизларга учрашувдан аввал қандай руҳлантирувчи сўзларни айтганди?

- Умуман олганда, тайёргарлигимиз яхши бўлганди. Мураббийимиз жамоани учрашувга яхши тайёрлаганди, деб ҳисоблайман.

- Иван Бошкович ўйиндан кейин нималар деди?

- Албатта, ғалаба билан табриклади ва кейинги ўйинга тайёргарлик кўрамиз деди.

- Бу голингизни ва ғалабани кимга бағишладингиз?

- Голимни Жасур ака Ҳасановга бағишлайман. Яқинда уларни туғилган кунлари.

- Ўйиннинг қайси қисмига келиб ғалаба қозонишингларни тўлиқ ҳис қилдингиз?

- Биринчи таймда яхши ўйнадик, деб ўйлайман. Иккинчи бўлимда эса ҳисоб учун ҳаракат қилдик. Айтиб ўтганимдек, ғалаба бизга зарур эди. Чунки ҳали Тошкентда “Бунёдкор”ни ютмаган эканмиз. Худога шукр, бу сафар ютдик.

- Учрашувда гол урдингиз ва голли пасни узатдингиз. Боз устига жамоа сардори сифатида ўйнадингиз ва учрашувнинг энг яхши футболчисига ҳам айландингиз. Сизда иштиёқ янада кучлимиди? Шу ҳақида ҳам тўхталиб ўтсангиз.

- Гол урганимга келсак, жамоада дўстларим билан бирга ҳаракат қилдик. Бунга жамоадошларимнинг ҳисса катта, уларга раҳмат.

- “Сўғдиёна” учта сафарда ўйнаяпти. “Бунёдкор”дан ташқари “Олимпик” ва сўнг “Нефтчи” майдонида ўйнайди. Бу сизларга оғирлиқ қилмайдими?

- Йўқ, оғирлик қилмайди. Чунки биринчи даврада биз ҳам 3 марта уйимизда ўйнаганмиз (кулади).

- Эшитишимча, биринчи даврадан кейин хорижга кетишингиз мумкинмиди? Шу ростми? Қандай таклифлар бўлганди ва қолишингизга нима сабаб?

- Жамоамни ташлаб ҳеч қаерга кетмоқчи эмасдим. Тўғриси, амалда яна шартномам бор. “Сўғдиёна”га иккинчи даврада ҳам қўлимдан келганича ёрдам бермоқчиман.

Шуҳратбек Жўраев.