Jamshid Iskanderov: "Nasaf" ustidan qozonilgan g‘alaba bizga oldingi ishonchni qaytardi

«Lokomotiv» klubining «Nasaf»ga qarshi o‘yini ko‘pchilikda katta qiziqish uyg‘otgani rost. Chunki doim ikkala jamoa o‘rtasidagi uchrashuvlar o‘ta qizg‘in va murosasiz tarzda kechadi. Bu safargi to‘qnashuv ham yuqori «harorat»da o‘tdi desak yanglishmaymiz. O‘yin taqdirini esa Jamshid Iskanderovning yagona goli har qildi va «Loko» oxirgi omadsizliklardan keyin nihoyat markaziy bellashuvda g‘alaba qozona oldi. O‘yindan so‘ng esa yagona gol muallifi bo‘lgan Iskanderov bilan suhbatlashdik. 

- «Lokomotiv» - «Nasaf» bahsi turning markaziy uchrashuvi edi va o‘yin ushbu ta’rifga juda mos tushdi. Bellashuvda ishtirok etgan futbolchi sifatida nima degan bo‘lardingiz?

- «Nasaf»ga qarshi uchrashuv qiyin o‘tishi ma’lum edi va o‘yin shunga yarasha bo‘ldi. Gapning ochig‘i, jamoamizda ruhiy tushkunlik bor edi. Boisi bunga qadar «Surxon»ga qarshi ikkita o‘yin o‘tkazgandik va o‘sha bellashuvlarda o‘zimizga kerakli natijalarni qo‘lga kirita olmagandik. Bizga g‘alaba suv va havodek zarur edi. «Nasaf» ustidan muhim uch ochkoni qo‘lga kirita oldik va bu g‘alaba biz uchun katta foyda bo‘ldi. Ayniqsa, keyingi bellashuvlarga ruhiy tomondan ancha tiklanib olamiz. Yigitlarga o‘ziga bo‘lgan ishonch kerak edi. «Nasaf»ga qarshi uchrashuv esa bizga oldingi ishonchni qaytardi.

- Demak, «Loko»ning Liga Kubogi va O‘zbekiston Kubogidan erta chiqib ketgani ruhiy tomondan ancha ta’sir qilibdi-da?

- Ha. O‘sha «Surxon»ga qarshi ikkita o‘yin biz uchun muvaffaqiyatsiz bo‘ldi. Natijada futbolchilar ruhiy tushkunlikka tushib qolishdi. Bizni o‘sha o‘yinlarda faqat g‘alabalar qoniqtirardi.

- Toshkentda «Surxon»ni 5:1 hisobida yutgandinglar. Ammo keyin Termizdan ikki marta quruq qo‘l bilan qaytdinglar. Demak, «Surxon» noqulay raqibga aylanyaptimi?

- Kubok o‘yinida qiynaldik. Lekin chempionat bahsida bemalol yutsak bo‘lardi. Afsuski, imkoniyatlarimizdan foydalana olmadik.

- «Nasaf» bilan uchrashuvda yagona golingiz o‘yin taqdirini hal qildi va bevosita o‘yin qahramoniga aylandingiz. Aslida sizda bellashuvdan avval mana shunday istak yuqorimidi?

- Har doim maydonga tushganimda birinchi navbatda jamoamga foydam tegishi uchun harakat qilaman. O‘zim qahramonga aylanishim yoki golni men urishim kerak, degan fikrlar xayolimda yo‘q. Har qanday holatda ham birinchi navbatda jamoaviy o‘yin hamda uning manfaatlari biz uchun ustun turadi. Bu safar shunchaki mening omadim keldi va gol urdim. Muhimi, g‘alaba qozona olganimizdan xursandman.

- «Lokomotiv» ikkinchi davrani yaxshi boshlay olmadi. Avvaliga Jizzaxda yutqazdi, keyin Termizda omadsizlikka uchradi. Sizningcha, jamoaga nima bo‘lgandi?

- Chiroyli o‘yinlar ko‘rsatgan va shunga yarasha golli imkoniyatlarimiz ham ko‘p bo‘lgan paytlar bo‘ldi. O‘sha «So‘g‘diyona» va «Surxon»ga qarshi uchrashuvlarda bizdan negadir omad yuz o‘girdi. Bir narsani to‘g‘ri tushunish kerakki, hozirgi paytda bizda go‘yoki yangi jamoa shakllanmoqda. Bizga biroz vaqt kerak bo‘ladi. Fursati kelganda, qilayotgan mehnatlarimizning foydasini olamiz.

- Samvel Babayanning ish uslubiga moslashish biroz vaqt talab etyapti, to‘g‘rimi?

- Ha, shunaqa. Futbolchilar qo‘llaridan kelganicha murabbiyning talablarini bajarib turishibdi. Lekin, o‘ylashimcha, o‘yindan-o‘yinga kuchayib boramiz.

- Ammo «Nasaf»ga qarshi uchrashuvda «Lokomotiv» o‘yinni nazoratiga oldi va asta-sekin jamoaning o‘yin chizgisi paydo bo‘layotgani ko‘rindi. Demak, «Nasaf» bilan uchrashuvga «nastroy» ham boshqacha bo‘lganmidi?

- Har bir uchrashuvga jiddiy tayyorgarlik ko‘ramiz. Futbolchi maydonga tushganda faqat g‘alaba ilinjida bo‘ladi. Yuqorida aytganimdek, mag‘lubiyat va durangdan so‘ng jamoa biroz tushkun holatga tushib qolgandi. Aksiga olib, yaratayotgan imkoniyatlarimiz golga aylanmayapti. «Nasaf»ga qarshi o‘yinda esa yigitlar qanday bo‘lmasin g‘alaba qozonib, o‘zlariga bo‘lgan ishonchni qaytarishni astoydil xohladilar. Qandaydir qiyin holatga tushib qolganimizni o‘zimiz ham tushunib turgandik.

- «Lokomotiv» chempionlik uchun kurashda «Paxtakor»dan ancha ortda qolyapti. Ochkolar o‘rtasidagi tafovut esa 13 tani tashkil qilmoqda. Vaziyatga real qaraydigan bo‘lsak, «Loko»ning bu boradagi imkoniyatlari deyarli qolmadimi?

- Haqiqatan o‘rtadagi farq juda katta. Lekin biz har bir uchrashuvda jamoamiz manfaatini o‘ylab g‘alabalar qozonishimiz va ochkolarimizni yig‘ishda davom etishimiz lozim. Qolganini esa vaqt ko‘rsatadi, hamma narsa bo‘lishi mumkin. Tan olaman, qiyin, mutlaqo oson demagan bo‘lardim.

- Har bir turdan so‘ng «Paxtakor»ning natijasiga ham qiziqyapsizmi?

- Nafaqat «Paxtakor», balki har bir jamoaning qayd etgan natijalariga qiziqib boraman.

- «Lokomotiv»dan tashqari, sizga ko‘proq qaysi jamoaning o‘yini yoqyapti?

- Har bir jamoa bilan o‘ynash qiyin. Biror-bir bahs oldidan bugun oson yutamiz deya olmaymiz. Chunki har bir jamoaning o‘ziga yarasha maqsadi bor. Oson raqiblar yo‘q.

- Babayan bosh murabbiy bo‘lganidan so‘ng jamoada birinchi navbatda nimani o‘zgartirdi?

- Har bir murabbiyning futbolga bo‘lgan qarashlari bor. Samvel Babayanning ham o‘z uslubi bor. Ayni paytda murabbiy tomonidan bizga aytilayotgan va tushuntirilayotgan ko‘rsatmalarini bajarishga harakat qilyapmiz. Muhimi, hammasi g‘alabali o‘yinlarga qaratilgan.

- «Lokomotiv» uchta frontda kurash olib borayotgandi. Biroq Kubok bahslaridan chiqib ketdi. Chempionlik uchun kurashdan esa uzoqlashib ketdi. Bunday paytda futbolchilarda motivatsiya yo‘qolmayaptimi?

- G‘alaba doim biz uchun asosiy vazifa bo‘lib qolaveradi. Axir durang yoki mag‘lubiyat uchun o‘ynamaymiz-ku.