Мағлубиятга сабабчи Шомуродов ва етакчи легионерлар Файзуллаев Ўрунов ўйини қандай баҳоланди?
Ўзбекистон терма жамоаси жаҳон чемпионатларидаги дебютини мағлубият билан бошлади. Фабио Каннаваро шогирдлари деярли қирқ дақиқа давомида дарвозасини дахлсиз сақлашга муваффақ бўлди, биринчи голни ўтказиб юборганидан сўнг ҳам ҳисобни тенглаштирди. Бироқ қолган икки голга жавоб қайтаришнинг иложи бўлмади.
Евро-Футбол нашри Ўзбекистон миллий терма жамоаси сафида Россия премьер-лигасида ўйнаган тўрт футболчи майдонга тушганига эътибор қаратди. Улардан бири – Рустам Ашурматов – алоҳида мақолада баҳоланган. Бу материалда Россия футболида анча таниқли бўлган қолган уч нафар легионер ўйинини таҳлил қилинди.
Энг юқори баҳолаш мезони – 10 балл (ўйин бошидаги старт баҳоси – 6,0).
ОСТОН ЎРУНОВ – 3,0.
"Спартак"нинг собиқ футболчиси биринчи бўлимда деярли кўринмай қолди, иккинчи таймга эса умуман майдонга чиқмади. Каннаваро Ўруновни Насруллаев билан бирга алмаштириб, чап қанотга янги куч ва тезлик қўшишни кўзлади. Маълум маънода бу қарор ўзини оқлади – иккинчи бўлимда тўп кўпроқ шу йўналишда ҳаракатлана бошлади.
Умуман олганда, Ўзбекистон таймдан кейин фаолроқ ва хавфлироқ ўйнай бошлади, ҳисоб бунга мажбур қилаётган эди. Аммо Ўруновга қайтсак, у 45+5 дақиқа ичида бор-йўғи саккиз марта тўпга тегди, шундан иккитаси аниқ пас бўлди, холос. Яъни, у деярли бутунлай ўйиндан узилиб қолди.
АББОСБЕК ФАЙЗУЛЛАЕВ – 4,0.
ЦСКАнинг собиқ юлдузи аниқ масофадан бўш дарвозага киритган голи ва бир неча жарима зарбасини ишлаб олгани билан ёдда қолди, холос. Бундан ташқари жиддий ижобий иш қилолмади.
Олдинги ўйинлардаги каби бу сафар ҳам кўп тўп йўқотди, ҳужумни ўткирлашга етарлича ҳисса қўшмади. Аббосбек бешта аниқ пасга қарши ўн олтита тўп йўқотишга йўл қўйди, олти марта узатган баланд паслари манзилига етмади.
Танаффусдан сўнг у бошқа позицияга ўтди, чап қанотга силжиди, аммо бу ҳам вазиятни сезиларли ўзгартирмади – натижа ўша-ўша қолди.
ЭЛДОР ШОМУРОДОВ – 4,0.
"Ростов"нинг собиқ ҳужумчиси шартли равишда икки гол эпизодига аралашди. Биринчи ҳолатда Достонбек Ҳамдамов чап қанотдан тўпни майдон четигача олиб бориб, пас узатди, Элдор эса кучли зарба йўллаб, дарвозабон Варгасни хатога мажбур қилди – қайтган тўпдан Файзуллаев гол урди.
Аммо орадан беш дақиқа ўтиб, марказдаги прессинг остида Шомуродов тўпни Пуэртага бой берди ва Колумбиянинг иккинчи голи айнан шу хатодан бошланди.
90+2-дақиқада эса Элдор рақиб жарима майдонининг ўнг томонига бироз тезроқ ҳаракатланишга улгурмагани учун имкониятни бой берди. Орадан кўп ўтмай тўп айнан ўша ҳудудга етди, аммо унга биринчи бўлиб Жон Ариас етиб борди (у қўли билан ўйнагандай туюлди, аммо ҳакам пенальти белгиламади).
Фикрлар