Mag‘lubiyatga sababchi Shomurodov va yetakchi legionerlar Fayzullaev Urunov o‘yini qanday baholandi?

O‘zbekiston terma jamoasi jahon chempionatlaridagi debyutini mag‘lubiyat bilan boshladi. Fabio Kannavaro shogirdlari deyarli qirq daqiqa davomida darvozasini daxlsiz saqlashga muvaffaq bo‘ldi, birinchi golni o‘tkazib yuborganidan so‘ng ham hisobni tenglashtirdi. Biroq qolgan ikki golga javob qaytarishning iloji bo‘lmadi.

Evro-Futbol nashri O‘zbekiston milliy terma jamoasi safida Rossiya premier-ligasida o‘ynagan to‘rt futbolchi maydonga tushganiga e’tibor qaratdi. Ulardan biri – Rustam Ashurmatov – alohida maqolada baholangan. Bu materialda Rossiya futbolida ancha taniqli bo‘lgan qolgan uch nafar legioner o‘yini tahlil qilindi.

Eng yuqori baholash mezoni – 10 ball (o‘yin boshidagi start bahosi – 6,0).

OSTON O‘RUNOV – 3,0. 

"Spartak"ning sobiq futbolchisi birinchi bo‘limda deyarli ko‘rinmay qoldi, ikkinchi taymga esa umuman maydonga chiqmadi. Kannavaro O‘runovni Nasrullaev bilan birga almashtirib, chap qanotga yangi kuch va tezlik qo‘shishni ko‘zladi. Ma’lum ma’noda bu qaror o‘zini oqladi – ikkinchi bo‘limda to‘p ko‘proq shu yo‘nalishda harakatlana boshladi. 

Umuman olganda, O‘zbekiston taymdan keyin faolroq va xavfliroq o‘ynay boshladi, hisob bunga majbur qilayotgan edi. Ammo O‘runovga qaytsak, u 45+5 daqiqa ichida bor-yo‘g‘i sakkiz marta to‘pga tegdi, shundan ikkitasi aniq pas bo‘ldi, xolos. Ya’ni, u deyarli butunlay o‘yindan uzilib qoldi.

ABBOSBEK FAYZULLAEV – 4,0. 

CSKAning sobiq yulduzi aniq masofadan bo‘sh darvozaga kiritgan goli va bir necha jarima zarbasini ishlab olgani bilan yodda qoldi, xolos. Bundan tashqari jiddiy ijobiy ish qila olmadi. 

Oldingi o‘yinlardagi kabi bu safar ham ko‘p to‘p yo‘qotdi, hujumni o‘tkirlashga yetarlicha hissa qo‘shmadi. Abbosbek beshta aniq pasga qarshi o‘n oltita to‘p yo‘qotishga yo‘l qo‘ydi, olti marta uzatgan baland paslari manziliga yetmadi. 

Tanaffusdan so‘ng u boshqa pozitsiyaga o‘tdi, chap qanotga siljidi, ammo bu ham vaziyatni sezilarli o‘zgartirmadi – natija o‘sha-o‘sha qoldi.

ELDOR SHOMURODOV – 4,0. 

"Rostov"ning sobiq hujumchisi shartli ravishda ikki gol epizodiga aralashdi. Birinchi holatda Dostonbek Hamdamov chap qanotdan to‘pni maydon chetigacha olib borib, pas uzatdi, Eldor esa kuchli zarba yo‘llab, darvozabon Vargasni xatoga majbur qildi – qaytgan to‘pdan Fayzullaev gol urdi. 

Ammo oradan besh daqiqa o‘tib, markazdagi pressing ostida Shomurodov to‘pni Puertaga boy berdi va Kolumbiyaning ikkinchi goli aynan shu xatodan boshlandi. 

90+2-daqiqada esa Eldor raqib jarima maydonining o‘ng tomoniga biroz tezroq harakatlanishga ulgurmagani uchun imkoniyatni boy berdi. Oradan ko‘p o‘tmay to‘p aynan o‘sha hududga yetdi, ammo unga birinchi bo‘lib Jon Arias yetib bordi (u qo‘li bilan o‘ynaganday tuyuldi, ammo hakam penalti belgilamadi).