Жамшид Саидов - "Бухоро"нинг кучли легионерларни жалб қилиш имконияти, жамоада нега сардор алмашгани ва бошқалар ҳақида

"Бухоро" - "Пахтакор" (0:4) учрашувидан сўнг, мезбонлар устози Жамшид Саидов ўйин борасида ўз фикрларини билдириб ўтди.

- "Пахтакор" ўзбек футболининг байроқдор жамоаларидан бири. Энг кучли футболчилар жамланган клуб. Ўйинчиларнинг класси ҳам юқори. Уларга Осиё Чемпионлар лигасида омад тилайман.

Биринчи даврада сафимизда ҳаракат қилган легионерлар билан хайрлашдик. Таркибни кучли легионерлар билан кучайтиришга имкониятимиз етмайди. Молиявий ҳолатимиз ёмон. Хорижликлар маҳаллий футболчилардан 2-3 карра кучли бўлиши керак. Унинг ўрнига ёшларга эътибор қаратганимиз маъқул. Иккинчи даврани легионерларсиз ўтказишга қарор қилдик. 

3-, 4-паслардан сўнг тўп йўқотилди? Тўғри, чунки ҳимояланаётган футболчилар ёшлардан иборат. Улар "Пахтакор" каби жамоа билан ўйнаганда шундай бўлади.

Биз бундай тактикада биринчи марта ўйнамаяпмиз. Жамоа ҳимоядан қарши ҳужумга ўтади. Азиз Ибрагимов "Бухоро"да биринчи марта ўйнамаяпти. У номдор футболчи. Шунинг учун футболчилар уни сардор сифатида танлашди. 

Стадионимиз бу мавсум тайёр бўлмайди. Кейинги йили ўйнасак керак. Ҳозирча уй учрашувларини Муборакдаги аренада ўтказамиз, - деди мураббий.