Jamshid Saidov: Bugun qimmatli ikki ochkoni yo‘qotdik

“Buxoro” klubi Coca-Cola Superliganing 23-turida Muborakda “Qizilqum”ni qabul qildi. G‘alaba o‘ta zarur bo‘lgan uchrashuvda jamoa yana ochko yo‘qotdi.

Garchi tezkor ravishda hisobni ochishgan bo‘lsa-da, oradan ko‘p o‘tmasdan “Qizilqum” muvozanatni tikladi. Oqibatda 1:1 hisobi o‘yin oxirigacha saqlanib qoldi. Bellashuvdan keyin “Buxoro” ustozi Jamshid Saidov shunday dedi:

- Yomon yoki yaxshi harakat qildik, demoqchi emasman. Har xolda bugun ham g‘alaba uchun maydonga tushgandik. Lekin bu ro‘y bermadi. Nima bo‘lganda ham yigitlarga rahmat deyman, o‘yin uchun, kurashganlari uchun. Afsuski, ularda mahorat va tajriba etishmadi.

Yana hisobimizda 3 ta o‘yin bor. Har bir oko uchun oxirigacha kurashamiz.  Oldindan esa hech nima deya olmayman, faqat maksimal natija uchun harakat qilamiz. O‘ylaymanki, bugun qimmatli ikki ochkoni yo‘qotdik.

Jamoani xususiylashtirish masalasida aniq fikrim yo‘q. Balki yaxshi bo‘lar, balki aksincha. Buni vaqt ko‘rsatadi, - dedi Saidov.