Жамшид Саидов "Бухоро"да вақтинча бош мураббий вазифасини бажармоқда, мураббийлар штабида эса ўзгаришлар бор

Яқинда “Бухоро” клубида техник директор вазифасида иш бошлаган Жамшид Саидов параллел равишда бош мураббий вазифасини вақтинча бажариб турганлиги маълум бўлди. Бу ҳақида ўзи билан гаплашганимизда ҳам тасдиқлади. Шу боис айни пайтда машғулотларни ушбу мутахассис ўтказмоқда.

Амалдаги бош мураббий Муҳсин Муҳаммадиев эса машғулотларда иштирок этаётгани йўқ. Ҳозирча унинг клубдан кетгани расман тасдиқланмаган бўлса-да, аммо воқеалар ривожи шунга қараб кетмоқда.

Бунинг устига мураббийлар штабида ҳам ўзгаришлар рўй берди. Бунга қадар клубда дарвозабонлар мураббийи вазифасида ишлаб келган Нурилло Ҳабибов “Бухоро”ни тарк этган. Унинг ўрнини эса Алексей Рошчин эгаллади. Ўз вақтида у чемпионатимиздаги турли клубларда фаолият олиб борган ва Ўзбекистон ёшлар терма жамоасида ҳам дарвозабонлар мураббийи сифатида ишлаган. Эндиликда эса у “Бухоро”да иш бошлади.

Бундан ташқари, жисмоний тайёргарлик бўйича мураббий Аугустин Чирица ҳам “Бухоро”да фаолиятини бошлаганини айтиш жоиз. Илгари у "Бунёдкор" ва "Сўғдиёна" клубларида ҳам ишлаган.