Жамшид Саидов: Ҳар бир очко жамоамиз учун жуда қадрли

“Бухоро” ҳамда “Қўқон-1912” жамоалари ўртасидаги учрашув анча қизиқарли ва муросасиз тарзда кечди. Иккала жамоа ҳам характер кўрсата олди. 2:2 ҳисобида якунланган учрашув тўғрисида бухороликлар бош мураббийи Жамшид Саидов қуйидагича муносабат билдирди:

- Биласиз-ку, биз ҳозир қийин вазиятдамиз. Шунга яраша “Қўқон-1912”га қарши ҳам жамоамизни оғир учрашув кутиб турганди. Гарчи биринчи бўлиб гол урган бўлсак-да, тезкорлик билан жавоб голини ўтказиб юбордик. Ўйинчиларимизга эса мувозанатни ушлаб туриш етишмади. Лекин улар ҳаракат қилишди, бор кучини беришди. Бунинг учун албатта миннатдорлик билдираман. Ҳар бир очко эса жамоамиз учун ўта қадрли. Аста-секин қийин вазиятдан чиқишимиз керак.

- Ўйин чиндан ҳам жанговор кечди. Қўқонликлар ўйин охирларида иккинчи голни ургач, жамоангизнинг мағлубиятдан қутулишига ишонганмидингиз?

- Футбол 94 ёки 95 дақиқа ҳам ўйналади. Шунинг учун охиригача курашиш керак бўлади. Албатта, иккинчи голни ўтказиб юборганимиздан сўнг, вазиятни ўнглашимиз қийин бўлади, деб ўйлагандим.

- Гарчи “Бухоро” ҳисобни очганига қарамай, иккита гол ўтказиб, кейинчалик аранг дурангга эришди. Сизнингча, жамоангиз бир очкони қўлга киритдими ёки иккинчи очкони йўқотдими?

- 1:2 ҳисобида ютқазаётгандик ва қўшимча дақиқаларнинг охирги сонияларида гол урганимиз учун, албатта қўлга киритилган бир очко учун Худога шукр деймиз.