Жасур Жалолиддинов янги жамоага мослашиш, Қурбон Бердиев қўл остида ўйнаш ва "Қайрат"нинг мақсадлари ҳақида гапирди

Қишки трансферлар вақтида Қозоғистоннинг "Қайрат" жамоаси сафига ижара асосида бориб қўшилган Жасур Жалолиддинов клуб матбуот хизматига интервью берди.

– Салом, Жасур! Сен яқинда "Қайрат" аъзосига айландинг. Жамоадагилар сени қандай кутиб олди? Ким мослашиб кетишингда ёрдам беряпти? Кимлар билан кўпроқ мулоқотда бўляпсан?

– Ассалому алайкум. Жамоадагилар мени жуда илиқ кутиб олишди, бундан мамнунман. Бундай тарзда кутиб олишларини кутмаган эдим. Дастлабки кунлардан менга Еркебулан Сейдахмет ёрдам берди, бироқ ҳозирда барча билан яхши муносабатдаман.

– Машғулотларда қайси жамоадошларинг сени кўпроқ ҳайратда қолдирди?

– Кимнидир ажратиб кўрсатиш қийин. Бутун жамоа юқори савияда ишлаяпти ва келаётган мавсумга жиддий тайёргарлик кўрмоқда. Агар кимнидир ажратиб кўрсатиш керак бўлса, мен Маки ва Яцекани айтган бўлардим.

– Қурбон Бердиев қўл остида ишлаш қандай?

– Қурбон Бакиевич сингари мураббий қўл остида ўйнаш мен учун катта шараф. Ҳамма футболчи ҳам фаолияти давомида у каби мутахассис билан ишлашни уддасидан чиқавермайди. Клубга келган биринчи кунимданоқ ўзим учун ҳар куни янги нарсалар кашф қиляпман. Албатта, навбатдаги мавсум мен учун фойдали бўлади.

– "Қайрат" олдида доимо битта вазифа бор – ҳар доим ғалаба қозониш. Сен ҳам янги мавсумда ўз олдингга шахсий мақсадлар қўйганмисан?

– Албатта, мен "Қайрат"дек жамоа қандай савиядалигини ва ҳар йили ўз олдига қандай мақсадлар қўйишини биламан. Мен олдимга индивидуал мақсадларни қўймайман. Жамоа мақсадлари – менинг шахсий мақсадимдир!

Манба: "Қайрат" матбуот хизмати.