ЖЧ-2022 саралашидаги рақибларимизга қарши ўйинлардаги натижаларимиз қандай бўлган?

ЖЧ-2022 иккинчи саралаш босқичига қуръа ташланди. Унга кўра, Ўзбекистон терма жамоаси "D" гуруҳидан жой олди. Саудия Арабистони, Фаластин, Сингапур ва Яман терма жамоалари билан ушбу гуруҳда куч синашадиган бўлди.

Россияда бўлиб ўтган 2018 йилги жаҳон чемпионати иккинчи саралаш босқичида ҳам терма жамоамиз Яман ва Фаластин термалари билан бир гуруҳдан ўрин эгаллаган эди.

Бунгача терма жамоамиз Саудия Арабистони термасига қарши 10 бор майдонда баҳслашган. 4 та ғалаба, битта дуранг ва 5 та мағлубиятга учраган. Саудияликлар дарвозасига 13 бор йўл топган термамиз ўз дарвозасидан 21 та тўп олиб чиққан. Араблар термасига қарши энг йирик ғалабамиз 1994 йилнинг 2 октябрь санасидаги 4:1 ҳисоби ва 2008 йилнинг 26 март кунги 3:0 ҳисоби бўлган. 2000 йил 20 октябрь санасида Саудия Арабистонига 5:0 ҳисобида терма жамоамиз ютқазган. Бу араблардан учраган энг йирик мағубиятимиздир.

Фаластин термасига қарши 4 бор майдонга тушиб барчасида зафар қучганмиз. 1:0, 2:0 ва 2 марта 3:0 ҳисобида ғалаба қозонганмиз. Умумий тўплар нисбати 9:0 кўринишини бермоқда.

Сингапур термаси билан 2 маротаба майдонга тушган термамиз 7:3 ва 1:0 натижалари билан рақибини таслим этган. Виктор Карпенко, Тимур Кападзе, Виталий Денисов, Азиз Ибрагимов, Максим Шацких биттадан ва Жепаров 2 бор гол урган. Жавоб учрашувидаги ягона голга эса Александр Гейнрих муаллифлик қилган.

Яман термасига қарши 4 та беллашувни ўтказиб, барчасида ғолиб бўлган терма жамоамиз ушбу ўйинларда 10 та гол уриб, 2 бор ўз дарвозасидан тўп олиб чиққан. Ушбу ўйинлар 2 маротаба 1:0, бир маротаба 3:1 ва яна битта йирик 5:1 ҳисоби билан тугаган.

Ўзбекистон термаси Саудия Арабистони, Сингапур, Фаластин ва Яман термаларига қарши кўриб турганингиздек умумий 20 бор майдонга тушган. 14 ғалаба, 1 дуранг ва 5 мағлубият. Тўплар фарқининг умумий кўриниши 40-26 ҳамюртларимиз фойдасига.