"ЖЧ-2022"даги омадсизликдан "Евро-2024" финалига қадар

Испания сўнгги марта бундан 12 йил олдин Еврони қўлга киритган. Шундан кейин "ЖЧ-2014"да гуруҳда қолиб кетганди, "ЖЧ-2018"да Россия, "ЖЧ-2022" эса Марокашга мағлуб бўлиб турнирни тарк этди. Аммо испанлар Еврода ҳар доим яхши натижа қайд этиб келади: "Евро-2016"даги Дель Боске шогирдлари нимчорак финалгача, "Евро-2020"да эса Энрике бошчилигидаги жамоа ярим финалгача етиб келди. Бугун эса улар ушбу совринни қўлга киритишга ҳаракат қилади. 

Қатар майдонларида бўлиб ўтган Жаҳон чемпионатида Испания Германия, Япония ва Коста-Рика билан бир гуруҳдан жой олди. Дастлабки турда "қизил фурия" Америкадан келган футболчиларга футболдан дарс ўтиб қўйди. 7:0 ҳисоби билан ғалаба қозонган жамоа барчани ҳайратга солиб, ўзини фаворитлар сафига қўшиб қўйди, лекин...

Германия билан бўлиб ўтган иккинчи турда испанлар бир очкони қўлга киритишди. Немислар биринчи турда мағлубиятга учрагани учун қийин ҳолатда қолиб кетди ва сўнгги турда уларга Испаниянинг ёрдами керак эди. Якунда эса испанлар Японияга таслим бўлишди. Дастлаб, Мората ҳисобни очган бўлса, Доан ва Танакалар жавоб қайтаришди. Бу Энрикенинг айёрлиги, деб ҳам тахмин қилинади. Сабаби, Испания гуруҳдан иккинчи ўрин билан чиқиб, плей-офф сеткасида ўзига қулайроқ йўлни танлаган бўлиши мумкин. Агарда Испания биринчи ўринни қўлга киритганида Хорватия, ундан кейин Бразилияга қарши майдонга тушиши ва ярим финалда Аргентина билан куч синашишини керак бўларди. 

Марокашни танлаган Испания катта хатога йўл қўйди. Ўйин давомида ҳисоб очилмади. Пенальтилар серияси эса жуда қизиқ тарзда якунланди. Испанлар таркибидан 11 метрлик жарима зарбасини амалга оширган Сарабия, Солер ва Бускетслар гол ура олишмади. Кетма-кет 3 та футболчи пенальтидан дарвозани ишғол қила олмагач, якуний зарбани Ҳакими амалга ошириб, Энрикега Рамосдан салом йўллади. 

Жаҳон чемпионатидан кейин раҳбарият Энрикени ўз лавозимидан озод қилишга қарор қилди. Унинг ўрнига эса кўпчиликка таниш бўлмаган Де ла Фуэнте олиб келинди. 63 ёшли мутахассис терма жамоани бутунлай янгилаб юборгани йўқ. Таркибда ёш ва қария футболчилар етарлича. Ҳаттоки Энрике даврида маҳаллийлаштирилган Ляпорт Саудия чемпионатида ўйнаётган бўлса ҳам, Германияга олиб келинди. Энг асосийси, испаниялик мураббий ички муҳитни ажойиб кўринишга келтирди. Дель Боске даврида "Реал" ва "Барса" футболчилари бир-бири билан ҳаттоки гаплашмаган пайтлари ҳам бўлишган. Аммо айни пайтда ундай эмас. Буни биз биринчи турда гол урган Карвахаль вазиятида ҳам кўришимиз мумкин. 

Испания бугун фаворит сифатида кўрилмоқда, лекин шунча танқид қилинган Англия финалгача ўз-ўзидан етиб келгани йўқ.