"ЖЧ–2026" учун ҳакамлар рўйхати эълон қилинди: Ўзбекистондан учлик танланди

ФИФА 2026 йилги жаҳон чемпионати учрашувларида ишлайдиган ҳакамлар рўйхатини расман эълон қилди. АҚШ, Мексика ва Канада мезбонлик қиладиган мусобақада жами 52 нафар бош ҳакам, 88 нафар қанот ҳаками ҳамда 30 нафар ВАР мутахассиси фаолият олиб боради. Бу барча олти конфедерация ва 50 та мамлакат вакилларини қамраб олган ҳолда жаҳон чемпионатлари тарихидаги энг йирик ҳакамлар штабига айланди.

Эътиборли жиҳати, ушбу нуфузли турнир учун Ўзбекистондан ҳам уч нафар мутахассис танлаб олинди. Илгиз Танташев бош ҳакам сифатида, Андрей Цапенко ва Тимур Гайнуллин эса қанот ҳакамлари сифатида ЖЧ–2026 ўйинларида ишлайди. Бу ўзбек ҳакамчилиги учун катта ютуқ сифатида баҳоланмоқда.

Рўйхатдан Европанинг энг машҳур ҳакамлари ҳам ўрин олган. Улар орасида Иштван Ковач, Франсуа Летексье, Данни Маккели, Шимон Марчиняк, Майкл Оливер, Энтони Тейлор, Клеман Тюрпен, Феликс Цвайер, Славко Винчич ва Маурицио Мариани каби таниқли номлар бор.

Шу тариқа, Ўзбекистон нафақат миллий терма жамоа, балки ҳакамлар бригадаси орқали ҳам ЖЧ–2026да ўз иштирокини таъминлади. Бу эса мамлакат футболи нуфузи халқаро майдонда янада ошиб бораётганини кўрсатади.