"Женоа"нинг энг қиммат футболчилари бешлиги. Рўйхатда Шомуродов борми?

Transfermarkt.de сайтига таяниб, А Серия аъзоси "Женоа"нинг энг қиммат 5 та футболчиси ҳақида маълумот берамиз. Эътиборли томони, энглар қаторида Элдор Шомуродов ҳам жой олган.

Рўйхатнинг бешинчи поғонасидан жароҳати сабаб, майдонга тушолмаётган Стефано Стураро жой олган. Трансфер нархи 6 млн еврога баҳоланган марказий ярим ҳимоячи ўтган йили "Ювентус"дан 16,5 млн еврога харид қилинган. Аслида, 27 ёшли футболчи генуяликларнинг тарбияланувчиси ҳисобланади. Португалиянинг "Спортинг" клубида ярим мавсум тўп тепган футболчи фаолиятини асосан, "Ювентус" ва "Женоа" клубларида ўтказган.

Бу борада, немис сайти Шомуродовнинг нархини 6,5 млн еврога баҳолаган. Италия клуби 25 ёшли форвардни катта умидлар билан Россиянинг "Ростов" клубидан 7,5 млн евро ва қўшимча бонуслар эвазига сотиб олди. Ўзбекистон терма жамоаси аъзоси "Верона" ва "Интер"га қарши ўйинларда майдонга тушишга улгурди. Афсуски, ҳужумчимиз жароҳати сабабли муҳим ўйинларда клубига ёрдам беролмаяпти.

Учинчи ўринни машҳур дарвозабон Маттиа Перин эгаллади. Унинг Transfermarkt.de сайтида берилган баҳоси 7,5 млн евродир. Фаолияти давомида Италия кубоги ва суперкубогини қўлга киритган моҳир посбон А Серия чемпионлигига ҳам эришган. Периннинг трансфер ҳуқуқи "Ювентус"га тегишли ҳисобланади. "Женоа" уни мавсум сўнгигача ижарага олган.

Ўнг қанот ҳимоячиси Давиде Дзаппакостанинг нархи 10 млн еврога тенг. У жамоасининг энг қиммат футболчилар шорт-листида иккинчи поғонага жойлашган. Англия кубоги ва Европа лигасида зафар қучган футболчи ёзда "Челси"дан ижарага олиб келинди. Жорий мавсум А Серияда 2 марта майдонга тушди ва коронавирус касаллигига чалингани туфайли қолган баҳсларда иштирок этолмади.

Шомуродовнинг жамоасидаги энг қиммат футболчи 21 ёшда! 13,5 млн евролик Лука Пеллегрини чап қанотда ҳаракат қилади. Ёш бўлишига қарамай, 2019 йилнинг ёзида "Ювентус" томонидан 22 млн евро эвазига харид қилинган. "Рома"да порлаган ярим ҳимоячи "Женоа"да ижара асосида тўп тепмоқда. Италия кубоги ғолиби бўла олган Пеллегрини машхур агент Мино Райоланинг мижози ҳисобланади.

Кўриб турганингиздек, таркибни анча йилдан бери фаолияти олиб бораётган ва "қариб қолган" футболчилар ўрнини "янги қон" билан тўлдиришни жамоа раҳбарияти тушуниб етган чоғи. Генуяликларнинг "Ювентус" билан алоқалари яхши эканлигини таъкидлаб ўтиш жоиз. Бундан ташқари, жамоа асосини ижарага олиб келинган футболчилар билан шакллантиради. Умумий ҳисобда, клубнинг 18 нафар футболчиси ижара асосида таркибни тўлдирган. "Женоа" ёзда Шомуродов ва яна 4 та футболчини сотиб олди ва Никола Ровеллани клубнинг академиясидан асосий жамоага ўтказди.