Жиру МЛСнинг 2 клуби билан музокаралар олиб бормоқда

Лондоннинг "Челси" клуби форварди Оливье Жиру фаолиятини океан ортида давом эттириши мумкин. Бу ҳақда италиялик журналист Николо Скира айтиб ўтди.

Юқоридаги манбаага кўра 33 ёшли франциялик футболчи билан АҚШнинг "Нью-Йорк Сити" ва Канаданинг "Ванкувер Уайткепс" клублари музокаралар олиб боришмоқда.

Айтиш керакки, Жирунинг ўзи ҳам сўнгги пайтларда асосан захирада қолиб кетаётгани боис “аристократлар” сафидан кетиш истагида.

Маълумот учун, Жиру жорий мавсум “Челси” сафида жами 5 та ўйинда майдонга тушди ва 1 та голли узатма ёздириб қўйишга эришди. Унинг айни дамдаги трансфер нархи 12 млн еврога баҳоланмоқда. Унинг клуб билан тузган амалдаги шартномаси эса жорий мавсум якунида ўз ниҳоясига етади.