Jiu-Jitsu bo‘yicha AJP Tour turniri O‘zbekistonda yoxud jiu-jitsuni yanada rivojlantirish vaqti keldi!

18-19 may kunlari Toshkent shahri jiu-jitsu bo‘yicha nufuzli turnirga mezbonlik qiladi. Ya’ni, jahonning eng ko‘zga ko‘ringan jiu-jitsu tashkiloti AJP Tour ilk marotaba O‘zbekistonga tashrif buyurmoqda.

Mazkur turnirga jahonning kuchli jitserlari tashrif buyurishi ko‘zda tutilmoqda. Shuningdek, O‘zbekistonning eng sara vakillari ham o‘z omadini sinab ko‘radi. Shu o‘rinda aytib o‘tish joizki, jiu-jitsu hozirgi kunda jadal sur’atlarda butun jahon bo‘ylab rivojlanib bormoqda. Terma jamoalar ishtirokida, klublar o‘rtasida va professionallar borasida ajoyib turnirlar tashkil etilmoqda. Mukofot jamg‘armalari ham havas qilarli darajada desak mubolag‘a bo‘lmaydi.
Albatta, AJP Tour musobaqalari juda yuqori saviyada tashkil etiladi.  Shuni inobatga olib, O‘zbekiston jiu-jitsu federatsiyasi bosh kotibi G‘ayratbek Nabiev hamda bosh murabbiy Rizo Safarov bilan Toshkentda tashkil etiluvchi turnirga qay darajada tayyorgarlik ko‘rayotganligiga oid fikrlari bilan qiziqdik.

G‘ayrat Nabiev: - AJP turnirlariga qiziqish jahonda juda yuqori. Kuchli sportchilar tashrif buyuradi. Hozirgi kunda arab mamlakatlarida bu sport turiga juda katta mablag‘ tikilmoqda. Mana Osiyo o‘yinlariga kiritildi. Olimpiada uchun ham harakat boshlangan. Bu darajadagi turnir O‘zbekistonda ilk marotaba bo‘lib o‘tadi. Biz imkon qadar harakat qilyapmiz. O‘ylaymizki, yuqori saviyada o‘tkazamiz.
Rizo Safarov: - Bu odatda klublar o‘rtasidagi turnir hisoblanadi. Yulduz sportchilar ishtirok etadi. Albatta, biz ham imkon qadar tayyorgarlik ko‘rishga harakat qilyapmiz. O‘ylaymizki, o‘zbekistonlik sportchilar ham yaxshi natija ko‘rsatadi, degan umiddaman.