Жон Жонснинг жаҳли чиқди: У Дана Уайтга кескин жавоб қайтарди

Аввалроқ, UFC раҳбари Дана Уайт собиқ чемпион Жон Жонс Оқ уйдаги турнир кардига киритилмаганини маълум қилиб, унинг сон бўғими билан боғлиқ муаммолари профессионал фаолиятини давом эттиришига тўсқинлик қилишини айтганди.

Бироқ бугун Жон Жонс промоушен раҳбарининг сўзларига эътироз билдириб, ташкилотдан амалдаги шартномасини бекор қилишни сўради.

ММА афсонасининг таъкидлашича, у ва жамоаси "Ultimate Fighting Championship" билан Оқ Уйда ўтадиган турнирда жанг қилиш масаласини жиддий муҳокама қилган. Ҳатто жангчи аввал қўйган молиявий талабини ҳам пасайтирган, бироқ шунда ҳам унга жуда кам гонорар таклиф этилган.

"Дана Уайтнинг дам олиш кунлари айтган гапларига жавоб бермоқчиман, чунки ҳақиқат мен ва мухлислар учун муҳим. Ҳа, менда сон бўғими артрити бор ва бу оғриқли. Лекин бу жанг қила олмайман, дегани эмас. Ўтган ҳафтада турнирга тайёргарлик кўриш учун ҳатто ствол ҳужайралари билан даволаниш муолажасидан ҳам ўтдим. Кардга кирганимда, бугун машғулот йиғинини бошлардим. UFC учун қилган ишларимдан кейин “Жонс, сен учун ҳаммаси тугади” деган гапларни эшитиш жуда аламли. Айниқса, жума кунининг ўзида UFC мени Оқ Уйдаги турнирга қўшиш учун яна қўнғироқ қилиб, анча кам пул таклиф қилганини ҳисобга олсак. Агар UFC ҳақиқатан ҳам мени фаолияти тугади деб ҳисобласа, унда менинг шартномамни ҳурмат билан бугуннинг ўзида бекор қилишларини сўрайман", — деб ёзди Жон ижтимоий тармоқда.