Жорди Альба: Хаттоки майдон марказидан ҳам гол эканлигини кўриш мумкин эди

Кеча бўлиб ўтган “Валенсия” ҳамда “Барселона” (1:1) жамоалари ўртасидаги баҳсдан сўнг каталонияликлар ҳимоячиси Жорди Альба учрашув ҳакамларидан норози эканлигини билдириб ўтди.

Айтиш лозимки, кечаги ўйиннинг 30-дақиқасида ҳакамлар Мессининг тоза голини инобатга олишмаган эди.

“Бу ҳакамларнинг қўпол хатоси. Мен майдон марказида эдим ва хатто мен ҳам бу гол эканлигини кўрдим. Бу шафқатсизлик.

Ўтган мавсум “Бетис”га қарши ўйинда ҳам биз билан ҳудди шундай ҳолат юз берган. Ким билади, балким ўша ўйиндаги натижа сабаб биз чемпионликдан маҳрум бўлгандирмиз.

Тўп дарвоза чизиғидан уч метр ичкарига кириб кетяпти, ҳакам эса буни инобатга олмаяпти, қандай қилиб бунақа бўлиши мумкин. Голлиги аниқку! Албатта, видеотакрорлар мана шундай вазиятларда ёрдам беради”, - дейди Альба.