Камолиддин Тожиев: "Нефтчи" ўтган мавсумга нисбатан кучлироқ" (тўлиқ матбуот анжумани)

Хабарингиз бор, эртага Ўзбекистон Суперкубогининг финал босқичи "Бобур Арена"да бўлиб ўтади. Ушбу бош соврин учун "Пахтакор" ва "Нефтчи" клублари ўзаро баҳс олиб боради. Мазкур учрашувдан аввал ташкил этилган матбуот анжуманида "Пахтакор" бош мураббийи Камолиддин Тожиев ва жамоа футболчиси Акмал Мозговой иштирок этиб, бўлажак ўйиндан олдин ўз фикрлари билан ўртоқлашди.

Камолиддин Тожиев: "Авваламбор Ассалому Алайкум. Тайёргарлик яхши даражада ўтди, футболчилар эртанги баҳс учун 100 фоиз тайёр. Ўтган ўйинни эсдан чиқарган ҳолда, бўлажак ўйинга тайёрландик. Яхши кайфиятда келдик ва эртага ғалаба қозониб, мухлисларни хурсанд қиламиз, Худо Хоҳласа. 
 
Акмал Мозговой: "Кайфият аъло даражада. Тайёргарлигимиз яхши бўлди ҳамда рақибни ҳам ўрганиб кириб, чиройли ўйин ва ғалаба орқали мухлисларимизни хурсанд қиламиз. 
 
Биламиз, ўтган мавсум Ўзбекистон кубоги финалини "Бобур Арена"да қўлга киритгансизлар. Фарғона Тошкентга қараганда Андижонга яқинроқ. Шу боисидан, кўплаб "Нефтчи" мухлислари ташриф буюриши кутиляпти. Шу фактор жамоага қийинчилик туғдирадими? 
 
"Албатта, бизнинг мухлислар ҳам келишади, гарчи кўп бўлишмаса-да. Стадион тўлса ўйин муҳити ҳам яхши бўлади, бу футболчиларга ва мухлисларга фойдали". 
 
"Навбаҳор"га қарши ўйиндан кейин матбуот анжуманида мен бу футболчиларни танимадим деб айтган эдингиз. Бўлажак ўйин олдидан ушбу хатоларга ечим топилдими? 
 
"Ўтган ўйиндан кейин ўйинни кўриб чиқдик ва футболчилар билан гаплашдик. Нимада хатолар кетганини ҳам аниқладик. "Нефтчи" 3 та ўйинда 9 та гол урди, биз эса 4 та. Эртага финал - 1 талик учрашув! Ким тайёр бўлса, ўша жамоа ғалаба қозонади!". 
 
Яна ўтган ўйинга кўп тўхталяпмиз, "Навбаҳор"га қарши мағлубиятдан сўнг бу баҳсдаги устунлик "Нефтчи" томонига ўтиб кетмадими ва бунга қанчалик қўшиласиз? 
 
"Камолиддин ака айтганидек, бу битта ўйиндан иборат. "Навбаҳор"га қарши бошқа баҳс, эртанги бошқа ўйин бўлади. Хатолар устида ишлаб, буларни такрорламасликка ҳаракат қиламиз". 
 
"Пахтакор"нинг барча голларини захирадан майдонга тушган футболчилар урмоқда. Бу жамоанинг асосий таркибида кадрлар муаммоси бор деб ўйламайсизми ёки ҳужумчилар танлашда адашяпман деб ўйлайсизми? 
 
"Йўқ. Ҳар бир ўйинга қараб футболчиларни майдонга ташлаймиз. Албатта, захирадан майдонга тушиб, ўйинни кучайтиргани яхши. Ўтган тўқнашувда Рустам асосийда чиқди, Пьётр асосийда чиқди - бу хато бўлди деб ўйламаймиз. Насиб қилса, эртанги баҳсда асосийда тушгани ҳам, захирадан тушгани ҳам бизга ёрдам беради". 
 
"Навбаҳор"га қарши ўйиндан кейин ўзингиз кўнглингиз тўлмаган чизиқларда ротация ёки янгилик бўладими? 
 
"Барчасини эртага кўрасизлар!". 
 
Сўнгги ўйиндаги мағлубиятдан сўнг жамоа таркибидаги барча аъзоларда кайфият ўта жиддий, ҳеч ким кулмаяпти ҳам. Раҳбариятдан гап эшитмадингизми? 
 
"Жиддий ўйин кутяпти, шу сабабдан ҳамма жиддий кайфиятда!". 
 
"Пахтакор" 7 та Суперкубокнинг 5 тасида мағлубиятга учраган, 2 тасидагина ғалаба қозонишга эришди. Учрашувдан олдин бу статистикага қараб ўтдингизми? 
 
"Бу аниқ. Биз барчасини кўриб чиқдик, статистика бу - статистика". 
 
"Пахтакор" ўтган мавсумнинг 2 та баҳсида ҳам "Нефтчи"ни мағлубиятга учратган. Буни ўзига бўлган ишонч сабаб деб айта оламиз. Саволим шундан иборатки, бу ишонч бўлажак ўйиндан олдин жамоага куч берадими ёки сиз ўтган мавсумдаги "Нефтчи"ни бу мавсумдаги "Нефтчи"дан кучлироқ деб ўйлайсизми? 
 
"Эртанги ўйин - кубок ўйини. Ўтган мавсум "Бухоро"га қарши ҳаракат қилганмиз ва қийинчилик билан ғалаба қозонганмиз. Эртанги баҳсда "Пахтакор" ёки "Нефтчи"ни фаворит деб айта олмаймиз. Ва биз ўтган мавсум 2 та турнирда ўйнаганмиз. Ҳозир "Нефтчи" бир неча ўйинчиларни жалб қилишган ва шу боис, ўтган мавсумга нисбатан ўсиш бор". 
 
Эртага 90 дақиқада ғолиб аниқланмаса, пенальтилар сериясига ўтамиз. "Пахтакор" пенальтилар сериясига қанчалик тайёрланди? 
 
"Энди Худо Хоҳласа, асосий вақтда ғалаба қозонишга ҳаракат қиламиз. Лекин базида 1 йил тайёрланиб, майдонга чиққанда ура олмаслиги мумкин". 
 
Акмал ака "Пахтакор"га қўшилганингиздан бери, бироз ўйингиз чиқмаяпти. Лекин бу футболчилар билан олдин ҳам ўйнагансиз. Адаптация жараёнлари қандай кетяпти ва бу эртанги ўйинга таъсир қилмайдими? 
 
Акмал Мозговой: "Гапингизга қўшилмайман. Биз ҳаммамиз бир оиламиз, ўртоғдекмиз. Футболда халақит қилмайди".

Агар эртага "Пахтакор" чемпион бўладиган бўлса, футболчиларга бонус борми? 
 
"Энди билмадим, тўғриси. Бу ҳақида ҳам гаплашмадик".