Kamonchilarimiz Parij Olimpiadasi yo‘lida ikkita litsenzion musobaqada qatnashadi

Kamondan otish bo‘yicha O‘zbekiston terma jamoasi Tailandga yo‘l oldi. Hamyurtlarimiz Bangkok shahrida tashkil etiladigan ketma-ket ikkita litsenzion musobaqalarda ishtirok etishadi.

Ularning birinchisi 5-9 noyabr kunlari o‘tadigan Osiyo chempionati bo‘lib, unda yakkalik dasturida Parij-2024 litsenziyalari o‘ynaladi. Reglamentga ko‘ra, Osiyo chempionatida shu paytgacha yo‘llanma ololmagan atletlar orasida eng yaxshi natija ko‘rsatgan ikki mergan Olimpiada ishtirokchisiga aylanadi.

Shundan so‘ng 10-12 noyabr kunlari Osiyo qit’asi uchun litsenzion turnir bo‘lib o‘tadi. Mazkur musobaqa faqat jamoaviy dasturda o‘tkazilib, unda erkaklar va ayollar o‘rtasida birinchi o‘rinni qo‘lga kiritgan davlatlargina Parij-2024 yo‘llanmasi sohibi bo‘lishadi. Terma jamoamiz Bangkokka quyidagi tarkibda yo‘l oldi:

Erkaklar:
Amirxon Sodiqov
Ozodbek Ungalov
Chen Yao Yuy
Mirjalol Mirolimov

Ayollar:
Ziyodaxon Abdusattorova
Nilufar Hamroeva
Jasmina Nurmanova
Bibixojar Yo‘ldosheva.

MOQ matbuot xizmati