Камончиларимиз Париж Олимпиадаси йўлида иккита лицензион мусобақада қатнашади

Камондан отиш бўйича Ўзбекистон терма жамоаси Таиландга йўл олди. Ҳамюртларимиз Бангкок шаҳрида ташкил этиладиган кетма-кет иккита лицензион мусобақаларда иштирок этишади.

Уларнинг биринчиси 5-9 ноябрь кунлари ўтадиган Осиё чемпионати бўлиб, унда яккалик дастурида Париж-2024 лицензиялари ўйналади. Регламентга кўра, Осиё чемпионатида шу пайтгача йўлланма ололмаган атлетлар орасида энг яхши натижа кўрсатган икки мерган Олимпиада иштирокчисига айланади.

Шундан сўнг 10-12 ноябрь кунлари Осиё қитъаси учун лицензион турнир бўлиб ўтади. Мазкур мусобақа фақат жамоавий дастурда ўтказилиб, унда эркаклар ва аёллар ўртасида биринчи ўринни қўлга киритган давлатларгина Париж-2024 йўлланмаси соҳиби бўлишади. Терма жамоамиз Бангкокка қуйидаги таркибда йўл олди:

Эркаклар:
Амирхон Содиқов
Озодбек Унгалов
Чен Яо Юй
Миржалол Миролимов

Аёллар:
Зиёдахон Абдусатторова
Нилуфар Ҳамроева
Жасмина Нурманова
Бибихожар Йўлдошева.

МОҚ матбуот хизмати