Канада мураббийи: "Ўзбекистон ҳеч нарсани осонликча бермайдиган жамоа"

Канада миллий терма жамоаси бош мураббийи Жесси Марш Ўзбекистонга қарши учрашувдан кейин жамоасининг ўйинига баҳо берди.

"Менимча, бу яхши ўйин бўлди. Жамоамизда кўплаб яхши ўйинлар ва яхши индивидуал чиқишлар бўлди. Ўйиндан кейин ҳам шу ҳақда гаплашдик: агар айрим кичик камчиликларни бартараф эта олсак, ўйинни янада кўпроқ назорат қилишимиз мумкин бўлади.

Аммо Ўзбекистон ҳеч нарсани осонликча бермайдиган жамоа. Улар ҳимояда жуда ишончли ҳаракат қилишади. Биз икки гол урдик, ҳатто яна ҳам кўпроқ киритишимиз мумкин эди. Қарши ҳужумларда жуда хавфли кўриндик ва кўп футболчилар яхши ўйин намойиш қилди.

Футболчиларнинг деярли 100 фоиз тайёр ҳолатга яқинлашаётганини, ўзини яхши ҳис қилаётганини ва ўйин суръатини ошираётганини кўриш ёқимли. Мен натижадан мамнунман. Бу биз учун яхши биринчи ўйин бўлди.

Энди бу баҳсдан сабоқ чиқаришимиз ва кейинги ўйинда янада кучлироқ бўлишимиз керак. Айниқса, бугунги каби оғир шароитларда, кўп қоидабузарликлар ва жароҳатдан қайтаётган футболчилар иштирок этаётган пайтда", — деди мураббий.

Шунингдек, у учрашув давомида футболчиларнинг руҳий ҳолати ва майдон сифати ҳақида ҳам фикр билдирди.

"Майдон аслида яхши ҳолатда эди. Унда сирпаниш, курашиш ва тўп учун қаттиқ беллашиш мумкин эди. Менимча, майдон яхши ўйнаш имконини берди.

Энг муҳими, жамоамизнинг концентрацияси юқори даражада бўлди. Баъзан бундай ўйинларда футболчилар жароҳат олишдан қўрқиб, интенсивликни пасайтириб қўйишади. Биз эса уларга қандай вазият бўлишидан қатъи назар диққатни йўқотмаслик кераклигини қайта-қайта таъкидладик.

Биз ҳар бир кундан унумли фойдаланишимиз, олдинга интилишимиз ва мақсадларимиздан кўз узмаслигимиз керак. Жамоа ўсишда ва ривожланишда давом этиши лозим. Бугун футболчиларнинг руҳияти том маънода идеал даражада эди. Бу эса яхши ўйин ва яхши ғалабага ёрдам берди", — деди у.

Мураббий жароҳат олган Мойеснинг ҳолати ҳақида ҳам маълумот берди.

"Йўқ, жиддий муаммо йўқ. Ҳужумга чиқилган вазиятда у Дерек билан тўқнашиб кетди ва зарба олди. У яхши ҳолатда. Илгари ҳам шунга ўхшаш ҳолатлар бўлган — зарба олади, лекин тез тикланади.

У яхши 30 дақиқа ўйнади. У тикланиб олади ва кейин Ирландияга қарши ўйинга тайёрлаймиз", — деди мутахассис.

Шунингдек, мураббий жароҳатдан кейин майдонга қайтган футболчилар ҳақида ҳам илиқ фикр билдирди.

"Аввало, уларнинг ҳар иккиси ҳам бу даражага қайтиш учун жуда кўп меҳнат қилди. Улар ўзларига имконият ярата олди.

Албатта, биз ҳали тўлиқ равишда чап оёқ билан зарба бериш машқларини бажараётганимиз йўқ. Мушак тўлиқ тикланиши учун вақт беришга ҳаракат қиляпмиз. Аммо шунга қарамай, у дарвоза билан яккама-якка чиққан вазиятда чап оёғи билан аниқ зарба бериб, гол урди. Ўзи ҳам ўзини ажойиб ҳис қилганини айтди.

Менимча, бу унга 100 фоиз тайёр ҳолатга жуда яқинлашганини ва жаҳон чемпионатига тайёр эканини ҳис қилишга ёрдам беради", — деди у.

Жонатан Осорионинг бошқа позицияда ўйнагани ҳақида сўралганда мураббий қуйидагича жавоб берди:

"Осо ҳақида гап кетганда, биз унинг жуда ақлли футболчи эканини яхши биламиз. Мен келганимдан буён икки йил ичида у ўйин интенсивлигини сезиларли даражада оширди.

Ҳозир у жуда яхши ҳолатда. Машғулотларда ҳам жуда яхши ишлаяпти. Турли позицияларда ҳаракат қила олиши унинг катта устунлиги ҳисобланади. Ўйин қандай кечганини ҳисобга олсак, бугун уни айнан шу жойда ишлатиш энг тўғри қарор бўлди.

Мен ундан жуда мамнунман. Жейден Нельсон ҳам яхши ўйин кўрсатди. Умуман олганда, кўп футболчилар яхши кўриниш бермоқда", — деди мураббий.

Сўнггида у ёмғирли об-ҳавога қарамай стадионга ташриф буюрган мухлисларга миннатдорлик билдирди.

"Менимча, Эдмонтон аҳолиси ёмон об-ҳавони яхши об-ҳаводан ҳам кўпроқ яхши кўради.

Мухлислар ажойиб бўлишди. Ҳамма эрта келди. Терма жамоага бўлган қўллаб-қувватлаш жуда яхши даражада. Биз олдинга қараб ҳаракат қилар эканмиз, бу қизиқиш янада ортади.

Кейинги бир неча ҳафта давомида мухлислар янада руҳланиши учун майдонда қизиқарли футбол кўрсата олганимиздан хурсандман", — деди Канада терма жамоаси бош мураббийи.