Канада Ўзбекистонга қарши ўйин олдидан хавф даражасини «сариқ»га кўтарди

Эдмонтонда Ўзбекистон ва Канада терма жамоалари ўртасидаги ўртоқлик учрашуви кучли ёмғир остида ўтиши мумкин, деб хабар бермоқда Sports.kz нашри Edmonton Journal манбасига таяниб.

Нашр ёзишича, жаҳон чемпионати олдидан Канада терма жамоасининг Эдмонтондаги хайрлашув ўйини об-ҳаво сабаб жиддий синовга айланиши эҳтимолдан холи эмас.

Келтирилишича, шанба куни эрталаб Канада давлат гидрометеорология хизмати ёғингарчилик бўйича прогнозни ошириб, «сариқ» даражада огоҳлантириш эълон қилган. Кучли ёмғирлар кечқурундан бошланиб, чоршанба тонггигача давом этиши мумкин. Эдмонтон атрофида 50 дан 100 миллиметргача ёғингарчилик кузатилиши кутилмоқда.

Душанба куни ҳаво ҳарорати кун давомида бор-йўғи 11 даражагача кўтарилиши, кечқурун эса, эркаклар терма жамоалари иштирокидаги Канада – Ўзбекистон ўйини деярли тўлиб турган «Commonwealth» стадионида бошланадиган вақтда, тахминан 9 даража атрофида бўлиши айтилмоқда.

«Шундай шароитда, махсус ушбу ўйин учун “Commonwealth” стадионига ўрнатилган вақтинчалик табиий газон шунча миқдордаги ёғингарчиликка қандай чидам кўрсатиши савол остида қолмоқда», — дея таъкидлайди портал.

Эслатиб ўтамиз, Ўзбекистон миллий терма жамоаси 26 май куни Тошкентдан тўғридан-тўғри авиарейс орқали Нью-Йоркка етиб келган. Жаҳон чемпионатидаги дебют олдидан Фабио Каннаваро шогирдлари икки ўртоқлик учрашуви ўтказади: 2026 йил 1 июнда Эдмонтонда Канадага қарши, 8 июнда эса Нью-Йорк шаҳрида Нидерландия терма жамоасига қарши майдонга тушиши режалаштирилган.