Каннаваро: "Жаҳон чемпионатида ўзбек халқини хурсанд қилиш учун ҳаракат қиламиз"

Ўзбекистон миллий терма жамоаси 2026 йилги Жаҳон чемпионатининг  "К" гуруҳидан жой олди ва Португалия, Колумбия, Янги Каледония, Ямайка ёки Конго жамоалар билан кейинги босқич учун кураш олиб боради.

"Оқ бўрилар" бош мураббийи Фабио Каннаваро қуръадан сўнг ижтимоий тармоқдаги шахсий саҳифасига пост жойлаб, ўз фирклари билан ўртоқлашди.

"Вашингтонда мен  Жаҳон чемпионати қуръасида иштирок этдим ва биргина нарса ҳақида ўйладим: Ўзбекистон. Рақибларимизнинг номи ҳали эълон қилинмасидан олдин ҳам, ҳаёлим жамоада эди. Қуръа давом этаётганида ҳам, Ўзбекистонни ўйладим. Рақибларимиз аниқлангандан кейин ҳам, яна ўйлашда давом этдим.

Чунки бу Жаҳон чемпионатида Ўзбекистонинг биринчи иштироки бўлади ва бу мукаммал бўлиш учун бор кучимизни сарфлашимиз керак. Жаҳон чемпионатида ўзбек халқини хурсанд қилиш учун ҳаракат қиламиз. Португалия, Колумбия ва учинчи рақиб — Янги Каледония, Ямайка ёки Конго. Уларга ҳурмат билан қараймиз. Аммо энг аввало, ўзимизга ва мухлисларимизга катта ҳурмат билан ёндашамиз", -- деб ёзди италиялик мутахассис.

Маълумот учун, АҚШ, Канада ва Мексика давлатлари мезбонлик қиладиган мундиал 2026 йилнинг 11 июнидан старт олади.