Каннаваро мундиалдаги рақиблар Колумбия ва Португалия ҳақида фикр билдирди

Ўзбекистон терма жамоаси бош мураббийи Фабио Каннаваро бўлажак Жаҳон чемпионати олдидан ўз фикрлари билан ўртоқлашди. Қуйида унинг La Gazzetta dello Sport нашрига берган интервьюсидан парчалар билан танишишингиз мумкин.

Италия Жаҳон чемпионатига чиқа олмади. Нима учун?

"Чунки Италия Босниядан қўрқди. Бизда Доннарумма, Калафиори, Бастони, Барелла, Тонали каби футболчилар бор. Боснияга ютқазишимиз мумкинлигига ишониш мен учун қийин. Кейинчалик эса ёшлар ривожига сармоя киритишни тўхтатдик. Биз ҳимоядан ҳужум қуришга уринувчи футболчиларни тайёрлаяпмиз, аммо италия футбол мактабини унутиб қўйяпмиз."

2006 йилги Италия терма жамоасига муносиб ҳозирги футболчи ким?

"Тонали. У менга жуда ёқади."

Ўзбекистон қанчалик "италянча" жамоа?

"Биринчидан, форма кўк рангда. Иккинчидан, жамоада 13 нафар италиялик бор. Улар орасида мураббийлар штаби, физиотерапевтлар ва энди бош ошпаз ҳам бор. Ўйинлардан кейин менюда пицца бўлиши ёқимли янгилик бўлади."

Гуруҳда Португалия ва Колумбия бор. Бу гуруҳдан чиқиш қанчалик қийин?

"Агар Португалиянинг ярим ҳимоясига қарасангиз, видеони икки сониядан кейин ўчириб қўясиз. Агар Колумбияга қарасангиз, ўн сониядан кейин. Биз эса олдинга қараб кетаверамиз. Йўқотадиган ҳеч нарсамиз йўқ ва курашда давом этамиз."

Жаҳон чемпионатининг сюрприз жамоаси ёки футболчиси ким бўлиши мумкин?

"Винченцо Монтелла бошқарувидаги Туркия. Футболчилар орасида эса Ҳусанов. У мен каби марказий ҳимоячи, жуда кучли ва ҳали анча ўсиши мумкин."

Мураббийлик фаолиятингиздаги энг қийин давр қайси бўлган?

"2021 йилда Хитойдан қайтганимда. Мен у ерда яхши ишладим деб ўйлагандим, аммо гўё қилган ишларимнинг қадри бўлмади. Ҳеч ким менга қўнғироқ қилмади. Кейин 'Беневенто'га, В Серияга бордим ва бу хато бўлди. 'Удинезе'да ҳам мураббийлик фаолиятим осон кечмади. Ҳали ҳам нега бундай бўлганини тушунмайман."

Ўзингизни 20 йилдан кейин қаерда кўрасиз?

"Ҳали ҳам мураббий сифатида. Мен Италия терма жамоаси бош мураббийи бўлиш учун ишлаяпман."

2006 йилги Жаҳон чемпионати финалида Гроссо пенальти тепганидан кейин навбат кимга келиши керак эди?

"Тони ва Якуинтага. Мен билан Гаттузо эса охирида эдик, ҳатто Буффондан ҳам кейин. Менимча, мен охиргидан битта олдинда бўлганман. Рино (Гаттузо) эса пенальти тепиш ўрнига мени қўрқитиб қўйган бўларди."