Karimov "Nasaf" - "Neftchi" o‘yinini boshqarishga haqlimi? "Navbahor"ning Toshkentdagi o‘yinida uning nima qilganini ko‘rdingizmi?

Superliganing 24-turida "Navbaxor" qiyinchilik bilan "Lokomotiv" ustidan g‘alaba qozondi. Hisob ishonchli ko‘rinishi mumkin, lekin "temiryo‘lchilar" ushbu o‘yinda hech bir jabhada raqibdan ortda qolmadi.

"Lochinlar" ikki golni ham ikkinchi taymda kiritishga muvaffaq bo‘ldi. Hammasi boshqacha bo‘lishi mumkin edi. Ko‘pchilik namanganliklarning g‘alabasi fonida bir vaziyatni ko‘zdan qochirdi. Birinchi bo‘lim so‘ngida Jamshid Boltaboev Sanjar Qodirqulovga nisbatan qo‘pollik ishlatdi. Uchrashuv bosh hakami RAHIMBEK KARIMOV avvaliga "Navbahor" futbolchisiga sariq kartochka ko‘rsatdi. Keyin esa VARdagi hamkasbi ABDURAShID XUDOYBERGANOV unga aloqaga chiqdi, shundan keyin vaziyatni tekshirishga o‘zi bordi. Hammasini ko‘rgan referi qarorini o‘zgartirmadi.

Xo‘sh, qoidalar nima deydi. "Futbol qoidalari" telegram kanali bu vaziyatga oydinlik kiritdi. Unga ko‘ra, bu vaziyat uchun Boltaboev to‘g‘ridan to‘g‘ri qizil kartochka olishi shart edi.

Qoidadagi izoh:

"Qoidalarning jiddiy buzilishi

Raqibning xavfsizligiga tahdid soluvchi haddan ortiq kuch ishlatish yoki haddan ziyod shafqatsizlik bilan bajarilgan podkat yoki yakkakurash, Qoidalarning jiddiy buzilishi sifatida jazolanishi kerak.

To‘p uchun kurashayotgan har qanday o‘yinchi raqibga oldidan, yon tomondan yoki orqadan bir yoki ikki oyoqni ishlatib haddan ortiq kuch ishlatish yoki haddan ziyod shafqatsizlik bilan tashlansa yoki raqibning xavfsizligiga tahdid solsa, Qoidalarni jiddiy tarzda buzishda aybdor sanaladi".

Xo‘p, menda yana bir savol tug‘ildi. Hakam bu vaziyat uchun VARga murojaat qilish shartmidi? Sababi ushbu epizodni undan yaxshiroq ko‘rgan inson yo‘q edi maydonda. Doim televidenie kameralarini bahona qilishadi, lekin bu vaziyatni aksiga olib, ular ham aniq ko‘rsatib bergan.

Men hech narsaga sha’ma qilmoqchi emasman, ammo ushbu tandem navbatdagi turda chempionlik uchun kurashayotgan "Nasaf" o‘yinida ishlashi ma’lum bo‘ldi.

Jaloliddin Qobiljonov