Карло Анчелотти: "Винисиус хато қилди, лекин у бу вазиятдан тўғри хулоса чиқаради"

Бразилия терма жамоаси бош мураббийи Карло Анчелотти Винисиус Жуниорнинг сўнгги хатти-ҳаракатлари ҳақида фикр билдирди.

— Сиз одатда Винисиуснинг қаттиқ ҳиссиётларини назорат қила оласиз ва унга маслаҳат бериб турасиз. Аммо “класико”да унинг алмаштирилганидан сўнг содир бўлган воқеани кўрдик. Бу хатоми?

— Ҳа, у хатога йўл қўйди ва “Реал”даги янги ролини англаб етиши керак — энди у кийиниш хонасида олдингидан ҳам муҳим шахс. Винисиус хатосини англади, узр сўради ва бу ҳолатдан сабоқ олиши лозим. Мураббий жамоани кучайтириш учун зарур деб билган алмашинувни амалга ошириш ҳуқуқига эга.

— Винисиус “Олтин тўп”ни ололмаганидан кейин унинг кайфияти ўзгардими?

— Балки бу уни бироз ранжитгандир, аммо ҳозир Вини ўзининг энг яхши ҳолатига яқин. У жуда яхши ўйнаяпти, жамоа учун муҳим футболчи. Винисиус кучли характерга эга, у хатолар ёки танқидларга ортиқча ёпишиб олмайди, тезда олдинга қараб ҳаракатланади. Ишончим комилки, у Жаҳон чемпионатига энг яхши ҳолатида етиб боради, — деди Анчелотти.