Катта клублар Шомуродовдан қочиб-қутилмайди! Элдорни Италия, Германия ва Испанияда кутишмоқда

“Женоа” ҳужумчиси Шомуродов Ўзбекистон, Италия ва Россия оммавий ахборот воситалари саҳифаларида, кўп мамлакатлардаги футбол мухлисларининг ижтимоий тармоқларида кенг  муҳокама қилинаётган футболчилардан ҳисобланади.

Умуман олганда, Элдор Россия премьер-лигасида муваффақиятли ўйнай бошлаганидан бери унинг фаолиятини кузатаётган мутахассислар, ўзбек футболчисига ишқибозлик қилаётган мухлисларнинг сони тобора ошиб бормоқда.

Айниқса, Шомуродов кучли бешлик мамлакатлари орасида ўзига хос хусусиятлари билан ажралиб турадиган А Серияга кўчиб ўтганидан кейин Элдорнинг мухлислари Италия чемпионатини янада диққат билан кузата бошлади.

135574797_4192617674082454_8272958649830949904_o

Қувонарлиси, Элдор Шомуродов ўзбек футболида камол топган, Россия чемпионатида “суяги қотган” чарм тўп усталари ҳам бутун дунё кузатиб борадиган кучли чемпионатларда муносиб ўйнашга қодир эканини исботлаб келмоқда.

Бир томондан, Элдорнинг ўйини кучайиб бораётгани яққол сезилиб турибди. Бу биринчи навбатда, Ўзбекистон миллий терма жамоасининг жаҳон чемпионатига чиқишини орзу қилаётган мухлису мутахассисларни хурсанд қилади, ҳаммамизга ишонч бағишлайди. Иккинчи томондан, кўпчиликни “Женоа”да ўзини кўрсатаётган Элдор Шомуродов қачон янада кучли жамоалардан бирига ўтиши қизиқтирмоқда. Айниқса, бу мавзу “Ювентус”нинг легионеримизга қизиқаётгани ҳақидаги хабарлар чиққанидан кейин анча долзарб бўлиб қолди.

Журналистлар Элдор Шомуродовнинг манфаатларини ҳимоя қилаётган “ProSports Management” консалтинг компанияси президенти Герман Ткаченкодан  легионеримизнинг келажакдаги режалари ҳақида сўради.

large_124

Тажрибали мутахассис бу мавзуга қуйидагича ойдинлик киритди.

“Женоа” ҳақиқатан ҳам “Ювентус” Шомуродов масаласини муҳокама қилганини, лекин ҳозирча расмий таклиф бўлмаганини билдирди. Туринликлар биз билан ҳам алоқага чиқди.

Катта клублар Элдордан қочиб-қутилмайди. Лекин бунинг учун Шомуродов ҳозиргидай ишлашда давом этиши, кўпроқ гол уриши, ўзида бор сифатларни намойиш қила олиши талаб этилади. “Женоа” ўйинчиларни катта клубларга сотишда анча тажриба тўплаган. Биз бу масалани трансфердан олдин таҳлил қилиб чиққанмиз. Айниқса, генуяликлар ҳужумчиларни бошқа клубга ўтказишга уста. Шунинг учун ҳам биз бу борада анча хотиржаммиз, - деди Герман Ткаченко.

Таъкидлаш жоизки, машҳур италиялик журналист Жанлука Ди Марцио ҳам Элдор Шомуродовга жиддий қизиқишлар борлигини таъкидлади. Унинг айтишича, бугунги кунда ўзбек ҳужумчисининг трансфер суммаси икки баробар кўтарилган ва уни олишни истаган клублар камида 15 миллион евродан воз кечишига тўғри келади. Бунга тайёр клублар ҳам бор.

Ҳамюртимизга “Ювентус”дан ташқари Бундеслигадан “Боруссия Дортмунд” ва Ла Лигадан “Севилья” каби жамоалар ҳам эътибор қарата бошлагани айтилмоқда.

135574797_4192617674082454_8272958649830949904_o_1

Биз эса, Шомуродов ҳозиргача эришаётган натижа ва даража билан кифояланиб қолмасдан, янада ўсиши ва кўтарилишига ишонамиз. Зеро, унинг ютуғи, бутун ўзбек футболининг муваффақиятидир. Айнан, Шомуродов каби энг кучли лигаларда ўйнайдиган футболчиларгина ўз миллий терма жамоасини футбол оламининг энг нуфузли мусобақаси – жаҳон чемпионатига олиб чиқа олади.

“Женоа” Шомуродовга таклиф қилинган катта суммадан воз кечди. Ёзда Элдорнинг бозори қайнайди!

“Женоа” Шомуродовни қандай олгани ошкор бўлди (Кўпчилик билмайдиган янги маълумотлар)!

 

Матнда хатолик топсангиз, ўша хатони белгилаб, бизга жўнатинг (Ctrl + Enter)

Фикрлар

Фикр қолдириш учун авторизациядан ўтинг!
&
Genoa
19/02/2021 08:35
Omad faqat oldinga

Минбар

Барча блоглар