“Каттақўрғон” мураббийи “Флуминенсе”дан келган легионерни кескин танқид қилди

Ўзбекистон Pro-лигасида иштирок этаётган “Каттақўрғон” бош мураббийи Ёркин Назаров жамоанинг янги аъзоси, Бразилиянинг “Флуминенсе” академияси тарбияланувчиси Исак Мартинс ҳақида кескин фикр билдирди, деб хабар берди Eurasia Football нашри.

Мураббийнинг сўзларига кўра, футболчи катта салоҳиятга эга, аммо унинг асосий муаммоси ишга бўлган муносабатидир.

- “Флуминенсе”нинг жуда яхши академияси бор. Исак Марсело ва Тьяго Силва билан бирга машғулот ўтказган. Лекин у ҳали ёш. Энг асосийси муаммоси – у ялқов. Акс ҳолда Ўзбекистонга келмаган бўларди.

Унинг “Флуминенсе”даги шериги ва дўсти Изакени Донецкнинг “Шахтёр” клуби 10 миллион еврога сотиб олди ва у футболчи ишончни оқлаяпти.

Агар Исак меҳнат қилса, у нафақат Ўзбекистон Pro-лигасида, балки Суперлигада ҳам энг яхшилардан бирига айланиши мумкин, - деди Ёрқин Назаров.

Мураббий шунингдек, бразилиялик футболчи билан қўшимча ишлар олиб борилаётганини, жумладан психологик жиҳатдан ҳам ишланаётганини таъкидлади.

- У билан психологик томондан ҳам ишлаяпмиз. Доимий мулоқотдамиз. Прогресс аниқ кўриниб турибди. Исак ўсишни бошлади. Унда жуда катта салоҳият бор. Машғулотларда нималар қилаётганини кўрсангиз эди, - деб қўшимча қилди мураббий.

Исак Мартинс жорий мавсум олдидан эркин агент сифатида жамоага қўшилди. У ҳозиргача учта ўйинда майдонга тушди, аммо жами 40 дақиқадан кўп ўйнамаган.

“Каттақўрғон” клуби 20 ёшли Исак Мартинс билан 2026 йилнинг 31 декабрига қадар давом этадиган шартнома имзолаган.