Кечагина завод ишчиси эди, бугун эса Суперлигада профессионал ўйинчи ёхуд "Андижон" футболчисининг ҳаётидаги кутилмаган бурилиш ҳақида

Одатда бирор футболчининг ушбу спорт турига қизиқиши ва унга ошно тутиниши ёшлигидан бошланади. Ёки қандайдир кутилмаган сабаб туфайли ҳам футболга кириб қолганлари йўқ эмас. Кейинчалик ана шундайларнинг ҳикоялари қизиқарли эшитилади. Бугунги мақоламизда ўзимизнинг қора кўзлардан бири, маҳаллий футболчимиз мисолида футболга кириб келгани ва бунгача қаерда ишлагани ҳақида сўз юритамиз.

Суперлига вакили “Андижон” футбол клубида қатор маҳаллий ўйинчилар бор. Қувонарлиси, уларга қаратилаётган эътибор ижобий тус олган. Шу сабабли охирги пайтларда клуб сафида андижонликлар сони сезиларли даражада ошган. Аслида-ку, ҳар бир вилоятимизда иқтидорлар жуда кўп. Фақат уларни ўз вақтида пайқаш, эътибор жуда муҳим. Акс ҳолда эртаси порлоқ бўлган йигитларни йўқотишимиз ҳеч гап эмас.

Гапни чўзмайликда, асосий масалага ўта қолайлик. “Андижон” сафида тўп сураётган Абдураҳмон Комиловни билсангиз керак. 26 ёшли ўйинчи яқин-яқингача ҳам футбол ишқибозларининг эътиборида эмасди. Биласизми, у 2-3 йил илгари ҳам футболчи эмас, балки заводда оддий ишчи бўлиб меҳнат қилиб юрарди.

Гап шундаки, Абдураҳмон “Узавтосаноат” таркибига кирувчи, “GM Uzbekistan”га бутловчи қисмлар, ўриндиқ етказиб беришга ихтисослашган  Андижондаги “Uz-Tong-Hong.Ko” Ўзбек-Корея қўшма корхонасида ишлаб келган. Маълумот ўрнида қўшимча қилмоқчимизки, Комилов мазкур заводда 2018 йилдан 2021 йилга қадар фаолият олиб борган. Ўша пайтларда уни вақти келиб катта футболда жавлон уриб, тўп суришини ким ўйлаганди, дейсиз?!  

Тўғри, Комилов “Uz-Tong-Hong.Ko” қўшма корхонасига ишга киргунига қадар ҳам футбол билан шуғулланган. Қизиқ-а, заводда оддий ишчи бўлиб юрган ва қисқа фурсат ичида катта футболда кўриниш бермоқда!

Мақоламиз қаҳрамони футболга кириб келишидан тортиб шу кунгача босиб ўтган йўли хусусида шундай деди: “Футболга кириб келишимда биринчи мураббийим – Санжар ака Тожибоев туртки бўлган, - дея эсга олди, Абдураҳмон. - 12 ёшимда Андижон туманидаги 24-мактабда бизни деб футбол тўгараги очган. Жисмоний тарбия дарсида футбол ўйнашимизни кўргач, шундай йўл тутган. Бир йил давомида шуғуллантирганидан кейин бизни Андижон футбол академиясига кўрик учун олиб борган. Ўшанда 300-400 нафар атрофида болалар келган. Шуларнинг орасидан 10 тасини танлаб олган ва уларнинг ичида биз ҳам бўлганмиз. 2010 йилнинг сентябрь ойида Андижон футбол академиясига ўқишга кирганмиз. 1997 йилларда туғилган ўйинчилар мураббийи Ҳамид ака Зокиров эди. Гуруҳда 24 та футболчи бўлган.

Афсуски, академиядаги фаолиятим мен учун кўнгилдагидек кечмаган. Чунки кўпинча захирада қолиб кетардим. Кейинчалик академиядан ўз хоҳишим билан чиқиб кетганман ва яна биринчи мураббийимиз Санжар ака Тожибоевга қайтганман. Футболни тарк этмоқчилигимни билдирганимда рози бўлмаган ва мени спорт коллежига олиб борган. У ерда 2-3 йил бўлганман. Шундан кейин “УзДонгЖу” жамоасига борганман. Ҳозирда “Андижон-SGS” сафида тўп сураётган дўстим Шокиржон Одилжонов “УзДонгЖу”га кўрик учун чақирган. 2017 йили у ерга борганман ва биринчи лигада жамоа учун рўйхатдан ўтганман. Ўша мавсумда биринчи даврада 10 га яқин учрашувда захирадан майдонга тушгандим, иккинчи даврасидан тўлиқ асосий таркибда ўйнашни бошлаганман. Лекин чемпионат охирига келиб жамоа молиявий етишмовчилик туфайли инқирозга юз тутган. Жамоадаги мураббийим Нозим ака Муллаохунов “УзДонгЖу” тарқаб кетганидан сўнг ўзи вилоят иккинчи лигасида жамоа қилган ва ўша ерда шуғулланиб юрганман.

Дарвоқе, 2013-2016 йиллар давомида спорт коллежидаги мураббийларим – Маҳмуд Маткаримов, Темур Тўхтасинов ва Даврон Абдуллаев мени ўсишимда катта ёрдам беришган. Ўшанда “Баркамол авлод” мусобақаларида ҳам иштирок этганман. Кейинчалик “Раш-Милк” жамоасига бизни чақиришган. Ўшанда “Uz-Tong-Hong.Ko” жамоасига қарши ўртоқлик учрашувида ўйнаганмиз. Ушбу ўйиндан сўнг “Uz-Tong-Hong.Ko” жамоаси сардори бўлиб ўйнаган Азиз ака Арзиев билан жамоа директори Жаҳонгир ака Нуриддинов мени “Uz-Tong-Hong.Ko” корхонасига ишга таклиф қилишган. 2018 йилдан шу ерда ишлай бошладим ва қўшимчасига корхона жамоасида футбол ўйнаб юрганман. 2021 йилга келиб катта футболга қадам қўйдим. Бунда аввало менга Нуриддинов билан Арзиев катта ёрдам кўрсатишди. Ўша йилнинг иккинчи даврасида “Андижон” клубига кўрикка бордим. Бош мураббий Виктор Кумиков эди. Мутахассисда яхши таассурот қолдира олганимдан сўнг мени жамоага қабул қилдилар.

Ростини айтсам, “УзДонгЖу” жамоаси тарқалиб кетганидан сўнг менда футболга қизиқиш сўниб қолганди. Юқорида айтганимдек, кейинчалик “Uz-Tong-Hong.Ko” корхонасига таклиф қилишди. Заводда ишлаган ҳолда завод жамоасида футбол ўйнадим ва ўзимни қайта кашф қилдим. У ерда меҳнат ва сабр қилишга, ота-онани қадрига етишга, ҳар бир вақт ғанимат эканлигини тушуниб етдим. Шу билан бирга аста-cекинлик билан бирга корхонада футбол ўйнаб яна қизиқишим кучайиб борди. Футболга қайтишимда ўша корхонада ишлашимга сабаб бўлган Жаҳонгир ака Нуриддинов билан Азиз ака Арзиев катта ёрдам беришди. Чунки завод жамоасида футбол ўйнаган ҳолда катта футболда ҳам ўйнай олишим мумкинлигини ҳис қилдим.

Виктор Балютович қўли остида яхши шуғулландим. Суперлигадаги дебютим 2021 йилги мавсумнинг охирги турида сафарда “Турон”га қарши бўлган. Жамоа про лигага тушиб кетганида ушбу лигада Кумиков қўлида яхши тайёргарлик кўрдик ва про лигада тўп сурдим. Биз чиройли тарзда Суперлигага қайтиш вазифасини уддалай олдик.

Заводдаги ишим асосан “Nexia R3” машинаси учун ўриндиқларни йиғардик. Ушбу завод жамоасида шуғулланиб юрган пайтимда ич-ичимдан профессионал футболчи бўлишни жуда-жуда хоҳлардим. Чунки “УзДонгЖу”да ўйнаганимда профессионал футболчи қанақа бўлишини ҳис қилганман. Худога шукр, ниятимга етдим ва профессионал футболчи бўлдим. Айнан заводда ишчи бўлиб меҳнат қилишни бошлаганимда профессионал футболчи бўлишга иштиёқим кучайган. Негаки, атрофимдаги инсонлар футбол одамлари эди. Бу эса менга ижобий тарафдан таъсир кўрсатган ва яхши ният қилганман.

Кўриб турганингиздек, мен ўзим истагандек профессионал футболчи бўла олдим. Фурсатдан фойдаланиб, ўша заводда ишлаб юрганимда Жаҳонгир ака Нуриддинов, шунингдек, завод жамоаси мураббийи бўлиб ишлаган Ориф ака Маматказинга ҳам раҳмат айтаман. Футболчи сифатида ўсишимга катта ёрдам кўрсатишди. Чунки шуларни ёрдамида “Uz-Tong-Hong.Ko” футбол жамоасида ўзимни кўрсатишга муваффақ бўлдим.

“Андижон” жамоаси шарафини ҳимоя қилаётганимдан бахтиёрман. Мақсадим жамоамизни кучли, барқарор клубга айланишида ўз ҳиссамизни қўшиш, юқори ўринларда бўлишини таъминлаш ҳамда мухлислар ишончини оқлаш асосий мақсадимларимдан бири”, - дейди Комилов.

Ҳа, инсон яхши ният қилган ҳолда нимани истаса, ўйлаганига албатта эришади. Фақат бунинг учун ўзидан ҳам ҳаракат ва меҳнат керак бўлади. Буни “ади” мисолида кўрдик.

Дарвоқе, Абдураҳмон Комиловни жамоадагилар ва футбол одамлари “ади” деб чақиришади. У клубнинг ҳозирги бош мураббийи Александр Хомяковни ҳам ёқимли маънода ажаблантирмоқда. Қолаверса, Комилов ҳимоянинг иккала қанотида бирдек ўйнай олади. Хечдан кўра кеч яхши деганларидек, футболчи 26 ёшда Суперлигада барқарор ўйин кўрсата бошлади. Кимдир эртароқ, кимдир кечроқ “очилади”. Аслида эса мақоламиз қаҳрамони айни ўйнайдиган ёшда ва унинг учун ҳаммаси олдинда...

Шуҳратбек Жўраев.