Кераксиз жарималар "Ҳумо"га панд берган учрашувдан фоторепортаж

Тошкентнинг "Ҳумо" клуби ўз майдонида Красноярскнинг "Сокол"ини қабул қилиб, 2:3 ҳисобида имкониятни бой берди. 7-дақиқада Владимир Коротков Евгений Смирягин қўриқлаётган дарвозанинг тўққизлигига шайба киритиб, ҳисобни очди. Беллашувнинг 17-дақиқасида, рақибдан сон жиҳатдан устунликка эга бўлинган пайтда Павел Здунов ўзининг аниқ зарбаси билан мувозанатни тиклашга эришди.

Қайд этиш жоиз, бугунги учрашувда Евгений Попихин шогирдлари кўплаб вазиятларда ўзларининг қўполликлари билан ажралиб туришди ва "Ҳумо" майдонда 4 киши қолган вақтда иккинчи шайба ўтказиб юборилган бўлса, учинчи даврда уч киши бўлиб ҳимояланаётган тошкентликлар ўз дарвозаларидан учинчи бор шайба олиб чиқишга мажбур бўлдилар. 

Ўйин сўнггида эса Павел Здунов ҳисони қисқартиришга эришди, аммо мувозанатни тиклаш учун вақт камлик қилди. Шу тариқа, "Ҳумо" Тошкентдаги ўйинлар сериясидан ўрин олган 4 баҳснинг учтасида мағлуб бўлиб, фақатгина биттасида зафар қучди холос.

Бугунги натижадан сўнг "қанотлилар" ҳисобидаги очколар сони 9 талигича қолди ва жамоа биринчи конференциядаги 18 клуб орасида 13-ўринни банд этиб турибди.

Попихин бошқарувидаги "Ҳумо" ўзининг навбатдаги ўйинини меҳмонда "Динамо-Тверь"га қарши ўтказади. Мазкур учрашув 13 октябрь куни Тошкент вақти билан соат 19:00 да старт олади.

Фикрлар

Фикр қолдириш учун авторизациядан ўтинг!