"Кетма-кет 3 та мағлубиятдан кейин ҳеч қайси раҳбар мураббийни мақтамаса керак?!" ёхуд "Сурхон" бош мураббийи қаерда?

“Сурхон” клуби учун Суперлигадаги иштироки омадсиз кечяпти. Тўғри, клуб дастлабки турда “Металлург”ни мағлуб этганди. Ҳозирча ўша ғалабаси улар учун ягоналигича қолмоқда. Шундан кейин бешта турдирки, термизликлар асосан очко йўқотиб келмоқда.

1 та ғалаба, 1 та дуранг ва 4 та мағлубият! Тўплар нисбати ҳам жуда ёмон. 3 та гол урган ва ўз дарвозасидан 11 та тўп ўтказган. Турнир жадвалида 13-ўринда.

Қизиғи, “Сурхон” бош мураббийи Руфат Акрамхўжаев ҳозирда жамоа билан бирга эмас. Кубок беллашувларида футболчиларни ўйинларга мураббийлар штабида ишлаётган Баҳром Ҳайдаров тайёрлади. Аввало, Акрамхўжаев ушбу вазиятга ойдинлик киритди.

- “Локомотив” билан ўйиндан кейин кетгандим. Сабаби, уйда оилавий муаммоларим бор эди. Бу ҳақида раҳбариятни огоҳлантириб қўйгандим. Кейин эса, “Насаф” билан ўйин куни яна жамоага келдим. Унгача футболчиларни ўйинга Баҳром Ҳайдаров тайёрлаганди. Барибир ўша учрашувда ҳам масъулият бўлганидан кейин “Насаф” билан учрашувга боришга қарор қилгандим. Гап натижа ёки бошқа нарсада эмас, аммо форс-мажор каби вазиятлар ҳам бўлиб тураркан. Худо хоҳласа, “Сурхон”даги ишимни давом эттираман. Кубок баҳсларида яна битта ўйинимиз қолган. Кўпроқ ёшларга эътибор қаратиляпти. Ҳаммаси яхши бўлиб турса, АГМК билан учрашувга тайёргарлик кўрамиз.

Барибир мазкур вазият бўйича турли гап-сўзлар йўқ эмас. Ёки Акрамхўжаев билан раҳбарият ўртасида келишмовчилик юз бердими?  Чунки натижалар мухлисларни қониқтираётгани йўқ.

- Раҳбарият билан ўртамизда келишмовчилик юз бермаган. Фақат кетма-кет учта мағлубиятдан кейин ҳеч қайси раҳбар мураббийни мақтамаса керак?! Ҳамма бундай пайтда ўз фикрини айтади. Орамизда келишмовчилик бўлмаган, аммо мағлубиятлар туфайли раҳбар бошингизни силамайди. Бу табиий ҳол ва бу тўғри қабул қилинади, - деди бош мураббий.

Клубнинг Суперлигадаги ўйинлари боя айтганимиздек, мухлисларни ва шу билан бирга раҳбариятни қониқтирмаяпти. Мураббийлар эса олтитта ўйинни таҳлил қилаётган бўлса ажаб эмас. Руфат Акрамхўжаев бу масалада шундай деди:

- Хоҳлайсизми-йўқми, бу янги жамоа. Бу баҳона эмас. Ўзимиздан ҳам камчиликлар ўтган бўлиши мумкин. Масалан, “Насаф” билан баҳсда иккита ҳар хил таймлар бўлди. “Локомотив”га қарши ўйинда ҳам шундай вазият бўлди. Биринчи таймда йигитлар ёмонроқ ўйнаганди, иккинчи бўлимда ўйинни ўзгартиришди. “Насаф”да эса кутилмаган голлар режаларни ўзгартириб юборди. Рақибнинг голлари жамоамизнинг руҳиятини ҳам чўктириб қўйди. Айниқса, Жиззахда “Сўғдиёна”га қарши учрашувдан сўнг, футболчилар руҳий тушкунликка тушиб қолди. Ўша учрашувда биз жуда аламли мағлубиятга учрагандик. Натижада, шу мағлубиятдан кейин футболчиларда ўзларига бўлган ишонч йўқолгандек туюлди. Футбол яна давом этаверади, биз эса йигитларни руҳий тушкунликдан олиб чиқишга ҳаракат қилишимиз керак. Мана, кубок доирасида “Сурхон” “Бухоро”га қарши баҳсда чиройли ғалаба қозонди. Ўйлайманки, бу кейинги ўйинларда ижобий туртки бўлади. Мураббийлар штабида ўзгариш бўлмаган. Фақат раҳбарият спорт директори лавозимига Абдумажид Тоировни таклиф қилган. Бу уларнинг қарори. Биз мураббиймиз.

Хўш, унда бош мураббий ишга қачон қайтади? Бу саволга унинг жавоби шундай бўлди:

- Яқин кунларда, балки кубок доирасида, “Динамо” билан баҳсгача қайтарман. Ўз муаммоларимни ҳал қилиб олганимдан кейин жамоа билан бирга бўламан. Раҳбариятнинг менга нисбатан ҳеч қандай қаршилиги йўқ. Ҳаммаси жойига тушади. Мен “Сурхон”дан кетганим йўқ. Агар қандайдир ўзгариш бўлса, бундан биринчи бўлиб сиз хабар топасиз.

Жамоанинг ўйини ва натижаларидан келиб чиқсак, таркиб кучайтирилиши зарурлиги ҳам кўриниб қоляпти. Иккинчи даврага жамоани кучайтириш режаси борми? Акрамхўжаев қуйидагиларни айтди:

- Ҳар бир мураббий жамоасининг кучайишини хоҳлайди. Имкониятларга қараб иш тутиш керак. Албатта, агар имкон бўлса кучайтирамиз. Лекин маҳаллий ёшларга эътибор бериш вазифаси қўйилган. Бу ишни қанчалик ижро этамиз, буни вақт кўрсатади.

Дарвоқе, “Сурхон” устози куни кеча “Про” дипломини қўлга киритди. Бунинг учун уни табрикладик. Энди Акрамхўжаев мураббийда тўплаётган билим ва тажрибаларини амалда қўллаши мумкин.

- 2018 йилнинг ноябрь ойида “Про” лицензияси учун ўқишимиз бошланганди. Бу сафаргиси олдинги йиллардагига қараганда бошқача бўлди. Бошида ҳаммаси режа бўйича кетаётганди. Ўзингиз биласиз, ўтган йили пандемия юз бериб қолди. Натижада ўқишимиз чўзилиб кетди. Бу лицензияни қўлга киритгач, ўзига яраша масъулият ҳам бўлади. Албатта, мураббий сифатида ўзимнинг ният ва орзуларим бор. Ўзбек футболига фойда келтирадиган мураббийлардан бири бўлишни хоҳлайман. Ҳа, бу каби ўқишларда янгиликлар бўлади. Аммо футболда ҳамма нарса ўйлаб топилган. Мураббий доим ўз устида ишлаши ва янгиликлар қидиришга ҳаракат қилиши керак. Лекин футболдаги ҳолатни мураккаблаштириш керак эмас. Шунда у адашиб қолмайди. Бу менинг шахсий фикрим. Менинг ҳам футболга ўз қарашим бор, - дея сўзини якунлади Руфат Акрамхўжаев.