"Kim bilan o‘ynayotganimizni bilardik" - "Qiziljar" bosh murabbiyi va uning futbolchisi "Navbahor" bilan o‘yindan so‘ng nimalar dedi?

Kecha “Navbahor” klubi Turkiyaning Antaliya shahrida olib borayotgan o‘quv-mashg‘ulot yig‘ini doirasida Qozog‘istonning “Qiziljar” klubiga qarshi o‘rtoqlik uchrashuvida maydonga tushdi. Namanganliklarning ilk nazorat bahsida qozog‘istonliklar 1:2 hisobida g‘alaba qozondilar.

Ushbu uchrashuv borasida “Qiziljar” klubi bosh murabbiyi Ali Aliev hamda jamoa yarim himoyachisi Miras Jenis o‘z fikrlari bilan o‘rtoqlashishdi.

Ali Aliev: "Navbahor" Osiyo Chempionlar ligasida yaxshi ishtirok etyapti"

“Birinchi navbatda yigitlarni va muxlislarimizni g‘alaba bilan tabriklayman. 10 yanvar kuni yig‘inga keldik, hammasi reja bo‘yicha davom etmoqda. Buning uchun mazkur yig‘inni tashkil qilib berayotgan insonlarga rahmat aytaman.

O‘yinga qaytsam, raqib jiddiy edi va kim bilan o‘ynayotganimizni bilardik. Ular oxirgi marta 4 dekabr kuni Osiyo Chempionlar ligasida g‘alaba qozonishgan, yaxshi ishtirok etishyapti. Oldinda esa “Navbahor”ni “Al-Ittixod” bilan o‘yini bor. “Navbahor”ning o‘ziga yarasha kuchga ega jamoa ekanligini bilardik. Ular bilan uchrashuvda futbolchilarimizga tartibli va taktik o‘yin ko‘rsatish kerakligini uqtirdim.

O‘yin yaxshi o‘tdi. Bir qancha vaziyatlar yaratdik. Hujumchilarimiz o‘zining yaratilgan vaziyatlaridan foydalanishdi. Bir qancha yosh futbolchilarimiz biz bilan yig‘inda qatnashmoqda. Ular ham yaxshi qo‘shila olishdi. Umumiy o‘yinni oladigan bo‘lsak, yanada yaxshilashimiz kerak, standartlarga e’tibor berishimiz lozim. Buning uchun ishlaymiz. Yangi qo‘shiladigan futbolchilarimizni kutyapmiz. Hujumkorlikni oshirish uchun tezroq tarkibimizni shakllantirib olishimiz darkor. Yana bir bor hammani g‘alaba bilan tabriklayman”, - deydi Aliev.

Miras Jenis: "O‘yin kutilganidek oson kechmadi"

“Yig‘indagi birinchi o‘yinni g‘alaba bilan boshladik. Bu umumiy jamoa fonida juda muhim deb bilaman. Ushbu uchrashuvga juda jiddiy tayyorgarlik ko‘rdik. Chunki raqib jiddiy ekanligini bilardik.

O‘yin kutilgandek oson kechmadi. Jamoamiz murabbiylari va rahbariyatiga yaxshi sharoitlar yaratib berishayotgani uchun rahmat aytaman. Bunday sharoit rivojlanish uchun muhim sanaladi. Bizga bildirilgan ishonch uchun ham rahmat. Muxlislarimiz bizni katta ishtiyoq bilan olqishlashgani uchun  minnatdormiz va tez orada yashil maydonda ko‘rishamiz”, - deya fikr bildirdi, futbolchi.