Клубга яна янги футболчи қўшилади ёхуд энди бу кечаги "Андижон" эмас!

Ниҳоят, андижонлик ишқибозларнинг кўнгли таскин топяпти. Нимага дейсизми? Қишки йиғин бошланганидан бери маҳаллий мухлисларни фақат бир савол қийнаб келди: у ҳам бўлса, таркибдаги ўзгаришлар билан боғлиқ эди. Яхши савиядаги ўйинчилар нега олинмаяпти, қабилидаги гап-сўзлар анча муҳокамаларга сабаб бўлди. Бу борада ҳатто бош мураббийни танқид қилганлар ҳам учради. Аммо буни тўғри қабул қилиш керак. Негаки, ҳар қандай ишқибоз севимли жамоасига бефарқ эмас экан, албатта, бошқалардан қолишмаган ҳолда ўзининг ёқтирган клуби ҳам кучайишини истайди.

Бош мураббий Отабек Ғуломхўжаев бир неча sports.uz сайти орқали чиқиш қилиб, мухлисларни хавотирга тушмаслигини, янги мавсумда албатта натижа бўлиши ҳақида айтиб келди. Бунинг учун “Андижон”да барча имкониятлар бор. Энди бу кечаги “Андижон” эмас. Йиллар давомида турли муаммолар-у, қийинчиликлар билан курашиб келган жамоа бу йилдан янгича қиёфага киряпти.

Тан олиш лозим, қарздорлик билан боғлиқ масалалар туфайли аксарият футболчиларнинг клубга нисбатан ишончи йўқолганди. Бунинг устига бошқалардан тўпланиб қолган қарздорликни айтмайсизми? Муаммо чиндан ҳам жиддий эди. Мухлислар эса ғамгин ҳолатга тушиб қолишганди. Қачонки, клуб тадбиркорнинг қўлига ўтганидан кейингина ижобий ишлар кўзга ташланишни бошлади. Ана энди ишқибозларнинг юзида табассум, қалбида эса ишонч қайтадан уйғонмоқда. Жамоа ишончли қўлларда эканлигига амин бўлмоқдалар. Олдинги легионерлардан бўлган қарзлар бартараф этилди.

Клубга доир охирги янгиликлар бўйича ҳамманинг хабари бор. Айниқса, Жасур Жалолиддиновнинг “Андижон”да тўп суришга рози бўлгани трансфер ойнаси очилган пайтдан буён амалга оширилган топ харидлардан бирига айланди. Ҳамма уни Европага кетишини кутаётган бир пайтда футболчи Андижонда пайдо бўлди. Бунинг биргина сабаби бор: у ҳам бўлса, Отабек Ғуломхўжаев. Табиийки, унинг жамоасида энди Жалолиддинов асосий фигурага айланади. Бу орқали футболчи ўйин тажрибасини янада ошириш имкониятига эга бўлади. “Андижон” Жалолиддиновни қўлга киритиш орқали селекцияда бошқалардан қолишмаётганини кўрсатиб қўйди. Чиндан ҳам бу жиддий юриш бўлди. Маълум бўлишича, эртага Жасур билан расман шартнома тузилади. Бугундан эса машғулотларга қўшилди. Уни жамоага кўндириш осон бўлмагани шубҳасиз. Шунинг учун “Андижон” устози тез орада Жасурни қандай қилиб жамоага таклиф қила олгани хусусида муносабат билдириши кутилмоқда.

Бу билан селекция ишлари тугагани йўқ. Ёдингизда бўлса, яқинда клуб италиялик ҳужумчи Мартин Боаке билан келишувга эришилгани ҳақида расмий хабарлар берилганди. Бироқ легионер ҳадеганда янги жамоасига келавермагач, мухлислар орасида шубҳа гумонлар пайдо бўлганди. Маълумот учун шуни айтиб ўтмоқчимизки, Боаке Андижонга 7 март куни тонгда етиб келиши кутилмоқда. Таркибда болгариялик Пламен Димов, қирғизистонлик Эдгар Бернхардт каби легионерлар борлигини ҳам унутмаслик керак. Бу борада шуни айтиш мумкинки, бош мураббий таркибда тажрибали ўйинчилар билан иқтидорли ёшларни уйғунлаштира олмоқда. Бунинг қандай натижа беришини албатта мавсум давомида кўрамиз.

Шунингдек, жамоага янги таклиф этилган Миркомил Локаев жароҳати сабабли сафдан чиққани маълум бўлди. Унинг даволаниб майдонга қайтишига афтидан икки ой атрофида вақт кетса керак. Бош мураббий эса жамоасига яна бир ўйинчини олиб келиш ҳаракатида юрибди. Ҳозирча унинг номи ошкор қилингани йўқ. Аммо музокаралар давом этаётгани аниқ. Тез орада бу борада ҳам расмий хабар чиқса ажаб эмас.

Хуллас, “Андижон”да ёмон таркиб шаклланмаяпти. Рақобатбардош жамоа тузилаётгани ҳақиқатга яқин. Қолганини эса вақт кўрсатади. Мухлислар эса чемпионат бошланишини сабрсизлик билан кутишяпти. Ўз навбатида клуб раҳбарлари ҳам бошланажак янги мавсум учун жиддий тайёргарлик кўришмоқда.

Стадионда катта ўзгаришлар бўляпти. “Бобур арена” янгича қиёфага кирмоқда. У ерда энди турли хил савдо дўконлари ҳам хизмат кўрсатади. Мухлислар учун стадионда барча қулайликлар яратиляпти. Қолаверса, ишқибозларни стадионга янада жалб қилиш мақсадида энди ҳар бир ўйинда ўзига хос ютуқли ўйинлар ўйналади. Қимматбаҳо совғалар бисёр, айниқса, ҳар бир учрашувда “Спарк” автомобили қайсидир омадли мухлисга насиб қилиши аниқ. Кўриб турганингиздек, жамоа раҳбарларининг режа ва мақсадлари катта. Уларга бирданига эришиб бўлмайди. Вақт олий ҳакам, деб бежизга айтилмайди. Ўз навбатида раҳбариятнинг мақсадлари амалга ошиши бевосита клубнинг натижаларига ҳам боғлиқ бўлишини унутмаслик лозим.

7 март куни Андижондаги “Ёшлар маркази”да  жамоа аъзоларини янги мавсум олдидан таништирув маросими ҳам бўлиб ўтиши ҳақида хабар бергандик. Ушбу тадбир давомида мухлислар ўзларининг қизиқтирган саволларига ҳам жавоб олишлари мумкин.