"Кожонинг йўлини тўсмоқчи эмасмиз, "Динамо"нинг келажагига ҳозирдан қайғуришимиз керак" - Вадим Абрамов

“Динамо” клуби чемпионатнинг охирги турида Самарқандда “Сўғдиёна”ни 1:0 ҳисобида мағлубиятга учратишнинг уддасидан чиқди. Беллашувдан кейин мезбонлар бош мураббийи Вадим Абрамов журналистларнинг саволларига жавоб қайтарди.

- Биринчи навбатда клубни эришган ғалабаси билан табриклайман. Биз аввало ишқибозларимизни қутлашимиз керак. Нега деганда, анчадан бери ғалаба қозона олмасдан келаётгандик. Худди чемпионатни бир ой олдин якунлагандекмиз. Фидокорона ўйини учун йигитлардан миннатдорман. Балки ўйинимиз чиройли чиқмагандир. Аммо, муҳими, ғалаба қозондик ва мухлисларимизни хурсанд эта олдик. Таркибда муаммоларимиз бор эди. Шундай бўлса-да, муносиб рақибни енгишга муваффақ бўлдик. Бунинг учун футболчиларга раҳмат. Балки омадимиз чопгандир. Негаки, рақиб томонидан ташкил этилган хавфли вазиятларда дарвозамизга тўп кирмади. Бизда ҳам иккита зўр имконият бўлиб, бир бор самарали фойдалана олдик. Келаси йили ишқибозларимизни кўпроқ хурсанд этишга ҳаракат қиламиз.

- Майкон билан Кожо ҳақида фикрингизни билмоқчи эдик...

- Майконга келсак, унда жароҳат бор эди. Шу боис охирги пайтларда майдонга туша олмаётганди. Юқорида айтиб ўтганимдек, таркиб билан боғлиқ муаммоларимиз юзага келганди. Шу сабаб ўринбосарлардан ўйинчиларни асосий клубга жалб этишимизга тўғри келди. Охир-оқибат сўнгги машғулотда кўриниш берган Майконни захирадан бўлса ҳам майдонга туширдик. Негаки, унинг позициясида ўйнайдиган бошқа футболчимиз деярли қолмаганди. Кожога келсак, у билан боғлиқ вазият шундай: Жоэлда “Истиқлол” билан келишув бор. Шунинг учун унинг йўлини тўсмоқчи эмасмиз. Агар у кетишни истаса марҳамат! Чунки кетиш истагига тушиб қолган одамни куч билан тўхтатиб бўлмайди. Аксинча, клубимиз у амалга оширган ишлари учун миннатдорлик билдириши лозим. Тўғри, Кожонинг яна бир йиллик шартномаси бор. Бироқ келишувга кўра, “Истиқлол” товон пулини тўлаши даркор. Агар ўйинчи қолишга қарор қилса бундан фақат хурсанд бўламиз. Мабодо, харидор томон 300 минг доллар тўласа, Жоэл билан боғлиқ барча масала ҳал бўлади.

- Вадим Карленович, “Динамо” иккинчи ўринни эгаллаган ОКМКни ютди. Чемпионга айланган “Насаф” билан эса уч бор дуранг ўйнади. Нима деб ўйлайсиз, бу “Динамо”нинг руҳияти кучлилигидан далолат берадими?

- Биласизми, ҳар қандай жамоа етакчиларга қарши бошқача иштиёқ билан майдонга тушади. Аниқроғи, ўзини шунга тайёрлайди. Айтишим керакки, биз Самарқандда ишқибозлар хафсаласини пир қилмайдиган жамоани шакллантирмоқчимиз. Бизга келадиган рақибларни бу ердан ақалли бир очко олиб қайтишни улар омад сифатида қабул қилишларини истаймиз. “Динамо”нинг келажаги ҳақида ҳозирдан қайғуришимиз керак бўлади. Кўриб турибсиз, бизда вилоят ҳокими ўзгарди. Шу сабаб бу борада ҳокимнинг қарашини билиб олишимиз даркор. Янги мавсумга эса ҳозирдан тайёргарлик кўриш зарур. Чунки жамоа декабрда қурилади, деган гап бор.

- Режалар қандай?

- Юқорида айтиб ўтганимдек, янги ҳокимнинг позициясини билиб олишимиз лозим. Шундан сўнг клуб бюджети, унга тааллуқли бўлган бошқа барча масалалар ҳал бўлади. Ниҳоясига етган мавсумда Суперлига иштирокчилари орасида бюджети энг оз жамоа биз бўлдик. Шунинг учун режалар билан боғлиқ саволни очиқ қолдириб, раҳбариятнинг қарорини кутайлик.