«Комо» Ла Лига жамоасидан ҳимоячи сотиб олиши мумкин

Испаниянинг «Вильярреал» клубида тўп сураётган марказий ҳимоячи Вилли Камбвала фаолиятини Италия чемпионатида давом эттириши мумкин. Бу ҳақда футбол бўйича инсайдер Фабрицио Романо ўз ижтимоий тармоқларида маълум қилди.

Манбага кўра, «Комо» раҳбарияти «Вильярреал» билан Камбвала трансфери бўйича музокара олиб бормоқда. Суҳбатлар жадал суръатда кетаётгани айтилмоқда, чунки ёш ҳимоячи Сеск Фабрегас бошқараётган жамоа учун устувор трансфер мақсади ҳисобланади.

21 ёшли Камбвала «Манчестер Юнайтед» тарбияланувчиси саналади. У Испанияда икки мавсум ўйнаб, барча мусобақалар доирасида 23 та ўйинда майдонга тушган, аммо гол ёки самарали узатма қайд этолмаган. Transfermarkt портали франциялик футболчининг бозор қийматини 3 миллион евро атрофида баҳоламоқда.