Конате: "Ливерпуль" қайта қурилмоқда ва яна совринлар ютади"

"Ливерпуль" ҳимоячиси Ибраима Конате жамоадаги қайта қурилиш жараёни ва ҳозирги натижалар ҳақида ўз фикрлари билан ўртоқлашди.

Франциялик футболчининг таъкидлашича, мерсисайдликлар янги ўйинчиларни жалб қилмоқда ва жамоа ҳали бир-бирига мослашиш босқичида.

"Биз янги футболчиларни олиб келяпмиз, мослашяпмиз, бир-биримизни тушунишга ҳаракат қиляпмиз ва вақт ўтиши билан албатта соврин ютамиз. Биз муваффақиятга эришамиз, Премьер-лига ёки Чемпионлар лигасини ютганимизда эса одамлар барча омадсиз мавсумларни унутиб юборади", — деди Конате ESPN’га берган интервьюсида.

Футболчи шунингдек, "Ливерпуль" мухлисларини алоҳида эътироф этиб, айни вақтда барча жамоа атрофида бирлашиши кераклигини айтди.

31 турдан кейин "Ливерпуль" Англия чемпионати турнир жадвалида 49 очко билан бешинчи ўринни эгаллаб турибди.

Эслатиб ўтиш жоиз, мерсисайдликлар мамлакатнинг амалдаги чемпионлари ҳисобланади.