Конте: "ВАР бор экан, бундай хатоларни қабул қилиш қийин"

"Наполи" бош мураббийи Антонио Конте Италия А серияси доирасида "Ювентус"га қарши ўйинда (0:3) танаффус олдидан Расмус Хойлунднинг жарима майдонида йиқилиб қолган эпизоди ҳақида фикр билдирди.

Учрашувнинг 39-дақиқасида "Наполи" ҳужумчиси Хoйлунд "Ювентус" ҳимоячиси Бремер билан тўқнашувдан сўнг жарима майдонида йиқилди. Шундан кейин Антонио Вергара ҳам Пьер Калулу билан алоқа пайтида майдонга қулади. Асосий ҳакам Маурицио Мариани ушбу ҳолатларда қоидабузарлик қайд этмади, ВАР эса ҳакамни мониторга чақирмади.

Конте эпизодни ВАР орқали кўриб чиқишни талаб қилган эди.

"Мен бу ҳолатни кўрмадим. Мен "Верона"га қарши ўйинимизни (2:2) бошқарган Марианига айтдим: ўша баҳсда уни икки марта ВАРга чақиришди ва у қарорини ўзгартирган эди. Бу ўйин жараёнидаги ҳолатлар, биз бу ҳақда ҳаддан ташқари кўп гапирамиз ва бу яхши эмас.

ВАРни кузатаётганлар ва ҳакамлик қилаётганлар томонидан доим ҳалоллик бўлишига умид қиламиз. Биз ғалати ҳолатларсиз, тоза ўйинни истаймиз. Агар хато бўлса, у инсон омили билан боғлиқ бўлиши керак. Илгари бундай хатоларга сабрлироқ муносабатда бўлишарди, чунки инсон хато қилган. Видео тизим пайдо бўлганидан кейин эса бундай хатоларни қабул қилиш анча қийин", — деди Конте.