Конте "Ювентус"га қайтиши ҳақидаги саволга тўлиқ жавоб берди

"Наполи" бош мураббийи Антонио Конте ўзининг собиқ клуби — "Ювентус" ҳақида тарқалган миш-мишларга муносабат билдирди. Журналистлар ва мухлислар орасида Конте мавсум якунланмасидан аввал Туринга қайтиши мумкинлиги ҳақида гап-сўзлар тарқалганди.

"Мени ранжитадиган ҳолат шуки, мавсум тугашига бир ой қолгандаёқ менинг "Ювентус"га ўтишим ҳақида миш-мишлар тарқала бошлади. Гўёки мен "Наполи"ни тарк этар эканман. Лекин мен бу давр мобайнида ким мен билан боғланишга ҳаракат қилган бўлса, ҳаммасини рад этдим. Аввало клуб президенти билан суҳбатлашмасдан туриб, ҳеч ким билан гаплашмаслигимни айтдим" — дейди Конте "Sky Sport Italia"га берган интервьюсида.

Антонио ва клуб президенти Аурелио Де Лаурентис ўртасидаги учрашувдан сўнг мураббий жамоада қолишга қарор қилди. Энди у неаполликлар билан яна икки йиллик шартнома бўйича фаолият олиб боради.

Эслатиб ўтамиз, Конте 2011–2014 йилларда "Ювентус"ни бошқарган ва жамоа билан Италия чемпионлигини қўлга киритган эди.