“Ковентри” гол уриш қийин бўлган дарвозабонни рекорд нархга сотиб олди

Англия Премьер-лигасининг янги иштирокчиси “Ковентри” дарвозабон Карл Рашуортнинг “Брайтон” клубидан доимий асосда қайтганини тасдиқлади.

Рашуорт 2025/2026 йилги мавсумни “Ковентри”да ижара асосида жуда муваффақиятли ўтказди. У Чемпионшипдаги барча 46 учрашувда майдонга тушиб, 17 та “қуруқ” ўйин қайд этди ва Фрэнк Лэмпард жамоасига чемпионлик ҳамда Премьер-лига йўлланмасини қўлга киритишда ёрдам берди.

Доимий трансфер бўйича музокаралар осон кечмаган бўлса-да, якунда “Ковентри” 25 ёшли дарвозабонни клуб тарихидаги рекорд — 22,5 миллион фунт эвазига сотиб олди.

Рашуорт бу ёзда Орель Аменд, Лум Чауна ва Фрэнк Оньекадан кейин “Ковентри”нинг тўртинчи янги футболчисига айланди.

Sky Sports маълумотига кўра, 2019 йилдан буён “Брайтон” тизимида бўлган, аммо асосий жамоа сафида расмий ўйин ўтказмаган Рашуорт бўйича клуб қайта сотиб олиш ҳуқуқини ҳамда кейинги трансфердан улуш олиш имкониятини сақлаб қолган.

- Карлнинг доимий асосда қайтганидан жуда хурсандмиз. У юқори савияли профессионал, ажойиб инсон ва Премьер-лигага чиқишимизда жамоага беқиёс ёрдам берди. У билан яна бирга ишлашни интиқлик билан кутяпман ва уни жамоада яна кўриб турганимдан мамнунман, - деди Фрэнк Лэмпард.