Криштиану Роналду олтинчи жаҳон чемпионатига тайёргарлик учун Португалия терма жамоасига келганини маълум қилди

Саудиянинг «Аль-Наср» жамоаси ҳамда Португалия терма жамоаси сардори, таниқли ҳужумчи Криштиану Роналду ижтимоий тармоқларда янги пост эълон қилиб, 2026 йилги жаҳон чемпионатига тайёргарлик олдидан миллий жамоа ихтиёрига етиб келганини маълум қилди. Мусобақа Канада, АҚШ ва Мексика ҳудудида ўтказилади.

«Миссия — мундиал бошланди!», — дея ёзди Роналду ўз саҳифасидаги сурат остида.

41 ёшли форвард Португалия терма жамоасининг 2026 йилги жаҳон чемпионати учун эълон қилинган якуний рўйхатига киритилди. Бу Роналду фаолиятидаги кетма-кет олтинчи жаҳон чемпионати бўлади.

Криштиану Роналду миллий жамоалар таркибида энг кўп гол урган футболчи сифатида дунё рекордига эга. У терма жамоа сафида 226 ўйинда 143 та гол муаллифи бўлган.

Португалия терма жамоаси ЖЧ-2026 мусобақасида «К» гуруҳида ўйнайди. Унинг рақиблари ДР Конго, Ўзбекистон ва Колумбия терма жамоалари бўлади.