Криштиану Роналду Саудия чемпионатида навбатдаги голини урди

"Ан-Наср" ҳужумчиси Криштиану Роналду Саудия Арабистони чемпионатида яна бир бор ўз ҳисобини тўлдирди.

40 ёшли португалиялик форвард "Ал-Холуд"га қарши учрашувнинг 47-дақиқасида Жоау Феликснинг узатмасидан сўнг ҳисобни очди.

Шу тариқа, Роналдунинг жорий чемпионатдаги голлари сони 18 ўйинда 17 тага етди. У тўпурарлар пойгасида фақат "Ал-Аҳли" ҳужумчиси Айвен Тоунидан (18 гол) ортда қолмоқда.

Умуман олганда, Роналду ушбу мавсумда клуби ва Португалия терма жамоаси сафида 27 та ўйинда 23 та гол муаллифи бўлди.