Кукурелья "Реал"га ўтгани учун рафиқасига ҳам ўлдириш билан таҳдид қилишяпти

Яқиндагина «Челси»дан «Реал» Мадрид таркибига ўтган ҳимоячи Марк Кукурельянинг рафиқаси Клаудия Родригес эридан кейин ўзига нисбатан ўлим билан қўрқитишлар кучайганини маълум қилди, деб ёзади A Bola.

Унинг сўзларига кўра, ижтимоий тармоқларда унга юборилаётган хабарлар сони кескин ошган. Уларнинг кўпчилиги ҳақорат ва жиддий таҳдидлар, жумладан ўлим билан қўрқитишларни ҳам ўз ичига олган. Маълумотларга кўра, бундай хабарларнинг бир қисми ҳуқуқни муҳофаза қилувчи идораларга юборилган.

«Барселона» тарбияланувчиси бўлган Кукурелья аввалроқ мухлисларнинг бир қисми норозилигини тушуниши мумкинлигини айтган, чунки у клубнинг тарихий рақиби ҳисобланган мадридликлар сафига қўшилди. Бироқ футболчи танқид бошқа, оиласига нисбатан таҳдидлар бошқа эканини таъкидлаб, бу чегарадан ўтиш мутлақо қабул қилиб бўлмаслигини айтган. Шу билан бирга, у «Реал» таклифини рад этиш жуда қийин бўлганини қайд этган.

Ўтган мавсумда Кукурелья «Челси» таркибида барча мусобақалар ҳисобида 50 та ўйинда майдонга тушди. У шу давр мобайнида бир бор гол урди ва тўртта голли узатма муаллифига айланди.